នៅក្នុង​ពិធីប្រគល់​រថយន្ត​ដល់វរសេនា​តូច​នគរបាល​ការពារ​ព្រំដែន​កាលពីថ្ងៃ​អង្គារ​ នៅអគ្គស្នងការដ្ឋាន​នគរបាលជាតិ​ លោក​ឧបនាយករដ្ឋមន្ត្រី ​ស ខេង​ រដ្ឋមន្ត្រី​ក្រសួង​មហាផ្ទៃ​បានលើក​ឡើង​ជា​សំណួរ​ថាតើ​អ្នកណា​ទទួល​ខុសត្រូវ​ចំពោះការ​នាំចូល​សារធាតុ​ផលិត​គ្រឿងញៀន​ចូលមក​កម្ពុជា? ​តាមរយៈ​ការបន្លឺ​សំណួរ​ខ្លាំងៗដូច្នេះ ​លោក ស ខេង​ បាន​ប្រាប់រដ្ឋមន្ត្រី​ដែលកាន់​កាប់​ក្រសួង​ពាក់ព័ន្ធ​ក្នុងការ​ផ្តល់​អាជ្ញាប័ណ្ណ​នាំសារធាតុ​ផលិត​គ្រឿងញៀន​ចូលកម្ពុជា​ មិនត្រូវ​មើលស្រាល​លើបញ្ហានេះទេ។​ បើពុំដូច្នេះ​រដ្ឋមន្ត្រី​រូបនោះ​ នឹងជាប់​ជំពាក់​នឹងការ​បំផ្លាញ​សុខភាព​សាធារណៈ​ និង​បំផ្លាញ​សេដ្ឋកិច្ច​ សង្គម​ ថែមទៀត។​