នៅក្នុងការបោះឆ្នោតជ្រើងរើសក្រុមប្រឹក្សាឃុំ សង្កាត់អាណត្តិទី៥ ដែលបានធ្វើឡើងកាលពីថ្ងៃទី០៥ ខែមិថុនាកន្លងទៅ គណបក្សប្រជាជនកម្ពុជាបានទទួលសម្លេងគាំទ្រជាង ៥,៣លានសម្លេង ហើយគណបក្សភ្លើងទៀន ដែលជាគណបក្សប្រឆាំងបានសម្លេងគាំទ្រតែជាង ១,៦លានសម្លេងប៉ុណ្ណោះ។ នេះបើតាមលទ្ធផលបឋមផ្លូវការរបស់គណៈកម្មាធិការជាតិរៀបចំការបោះឆ្នោត(គ.ជ.ប)។ តាមរយៈលទ្ធផលនៃការបោះឆ្នោតនេះ គណបក្សក្រៅរដ្ឋាភិបាលមួយចំនួនបានហៅការបោះឆ្នោតនេះ ថាជាការបោះឆ្នោតដ៏អាក្រក់បំផុតជាងពេលណាៗទាំងអស់។ ក៏ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា ថាវាជាការចាញ់ដ៏អាក្រក់បំផុតរបស់គណបក្សប្រឆាំង និងគណបក្សប្រកួតប្រែជែង ជាហេតុនាំឲ្យមានការវាយតម្លៃការបោះឆ្នោត ដោយមិនផ្តោតទៅលើសភាពការណ៍ជាក់ស្តែង។