ប្រជាពលរដ្ឋភូមា សម្តែង​ការ​ខឹងក្តៅក្រហាយ​ នឹងនាយករដ្ឋមន្ត្រី​លោក ហ៊ុន សែន​ ដែល​ប្រកាស​ទៅ​ធ្វើ​ទស្សនកិច្ច​ នៅ​ប្រទេស​​ភូមា ដើមខែមករា ឆ្នាំ២០២២​​​។ ពួក​គេ​បាន​ធ្វើ​បាតុកម្ម ដុត​រូបថត​ និង​ជាន់​ឈ្លី​រូប​លោក ​ហ៊ុន ​សែន និង​រូប​ថ្នាក់ដឹកនាំ​ភូមាដែរ។​ ចំពោះ​ការ​ជាន់ឈ្លី​និងដុត​រូបថតនេះ​​  គឺត្រូវ​​​លោក សុខ សុគន្ធ ដែល​រស់​នៅ​ស្រុកមាន​​សេរីភាព​ ​គិតថា ជាការ​«បញ្ចេញមតិ​ធម្មតា» និង ពុំ​មែន​ជាការ​ប្រមាថអ្វីធំដុំទេ។ ​​ ​អ្នកវិភាគ​នយោបាយ​ស្រុក​ខ្មែរ​ រូបនេះ បញ្ចេញ​យោបល់​ថា ទោះបីជា​​ លោក ហ៊ុន សែន តែបន្ត​ប្រកាន់​ជំហរ អញ្ជើញ​ទៅស្រុក​ភូមា​ នៅ​ពេល​ដ៏ខ្លី​ខាងមុខទៀត​ ក៏​លោក​មិនដឹង​សង្ឃឹម​​ថា​នឹង​ដោះស្រាយ​បញ្ហា​អ្វី​របស់​ភូមា​បាន​ច្រើន​ដែរ  ពីព្រោះថា វិបត្តិ​ភូមា​ជា​បញ្ហា​ចាក់ស្រែះ​ដ៏«​សែន​លំបាក»។