គណបក្សរស្មីខេមរា បានចាប់ផ្តើមធ្វើយុទ្ធនាការស្វែងរកសម្លេងឆ្នោតចាប់តាំងពីថ្ងៃទី២១ ខែឧសភាមកម្ល៉េះ នៅក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥នេះ។ ដោយសារជាគណបក្សថ្មី គណគណបក្សរស្មីខេមរាបានដាក់បេក្ខភាពតែ៦ ឃុំ សង្កាត់ប៉ុណ្ណោះ នៅលើទីតាំងចំនួន៣ខេត្ត គឺខេត្តបន្ទាយមានជ័យ ខេត្តសៀមរាប និងខេត្តកំពង់ស្ពឺ។ លោក សឿ ចាន់ធី អគ្គលេខាធិការរងគណបក្សរស្មីខេមរា បានប្រាប់វិទ្យុបារាំង RFI ថាឆ្លងកាត់យុទ្ធនាការជាច្រើនថ្ងៃកន្លងទៅនេះ លោកសង្ឃឹមថា គណបក្សរស្មីខេមរា នឹងទទួលបានការគាំទ្រពីអ្នកបោះឆ្នោត បើទោះណាជាគណបក្សលោកដាក់បេក្ខភាពតិចឃុំសង្កាត់ក៏ដោយ។