រដ្ឋាភិបាល​កម្ពុជា​ ប៉ុន្មាន​ថ្ងៃ​ចុង​ក្រោយ​នេះ ​បាន​ចាប់​ផ្តើម​ចេញ​អន្តរាគមន៍​ក្នុង​ការ​ផ្តល់​ស្រូវ​ពូជ​ ជូន​ប្រជាកសិករ​នៅ​តាម​បណ្តា​ខេត្ត​ ដែល​រង​ផល​ប៉ះពាល់​ដោយសារ​គ្រោះ​ទឹក​ជំនន់​។ លោក ​ថេង សាវឿន ​ប្រធាន​សមាគម​សម្ព័ន្ធ​សហគមន៍​កសិករ​កម្ពុជា ​យល់ថា​ នេះ​ជា​ទំនួល​ខុស​ត្រូវ​របស់​រដ្ឋ​ ក្នុង​ការ​ដោះស្រាយ​បញ្ហា​ប្រឈម​របស់​ពលរដ្ឋ​ ជា​ពិសេស​ក្នុង​វិស័យ​កសិកម្ម​។ ជាមួយ​គ្នា​នេះ​ លោក ថេង សាវឿន ​បង្ហាញ​ចំណាប់​អារម្មណ៍​ថា ​លោក ឌិត ទីណា ​រដ្ឋមន្ត្រី​​កសិកម្ម​ថ្មី ​ហាក់​កំពុង​មាន​ភាព​សកម្ម​ក្នុង​ការ​ដោះស្រាយ​បញ្ហា​របស់​កសិករ​នៅ​មូលដ្ឋាន​។ យ៉ាងណាមិញ​ សម្រាប់​គោលនយោបាយ​លោក​រដ្ឋមន្ត្រី​កសិកម្ម​ថ្មី ​ដែល​ចង់​ឲ្យ​ប្រជាកសិករ​កាត់​បន្ថយ​ការ​ចំណាយ​ថ្លៃ​ដើម​នោះ​ លោក​ ថេង សាវឿន ​យល់​ថា​ អាច​ទៅ​រួច​ ប្រសិន​បើ​រដ្ឋ​ជួយ​ចេញ​ថ្លៃ​ចំណាយ​ដើម​ទុន​របស់​កសិករ​។