ថ្ងៃចន្ទទី​១៣មីនា លោក​​ចូ បៃ​ដិន នឹងជួប​ជាមួយ​លោក​ រីស៊ី ស៊ូណាក់ នាយករដ្ឋមន្ត្រីអង់គ្លេស​ និងលោក អង់តូនី អាល់បាណេស នាយករដ្ឋមន្ត្រី​អូស្ត្រាលី  នៅឯមូលដ្ឋានកងទ័ពជើងទឹកអាមេរិក ក្នុងរដ្ឋ​កាលីហ្វ័រញ៉ា។ ជំនួប​រវាងថ្នាក់ដឹកនាំទាំង​៣ ធ្វើឡើង​នៅក្នុងក្របខណ្ឌ​សម្ព័ន្ធភាព AUKUS ហើយតាម​ការគ្រោងទុក នៅថ្ងៃនេះគឺ​ថ្នាក់ដឹកនាំទាំង៣ នឹងចុះហត្ថលេខាជាផ្លូវការ​ លើ​​កិច្ចព្រមព្រៀងស្តីពី​នាវាមុជទឹកបាត​​សមុទ្ទ ដើរដោយ​ថាមពលនុយក្លេអ៊ែរ។ គួរ​រំលឹកថា អូស្ត្រាលីបានបោះបង់ចោល​កិច្ចសន្យាទិញនាវាមុជទឹកបាតសមុទ្ទរបស់បារាំង ហើយ​បានងាកទៅទិញពីសហរដ្ឋអាមេរិក តាមរយៈការចូលរួម​នៅក្នុងសម្ព័ន្ធភាព AUKUS។ បញ្ហានេះបានបង្កជាវិបត្តិការទូតដ៏ធំមួយ រវាងបារាំង ជាមួយ​នឹងអូស្ត្រាលី ព្រមទាំងសហរដ្ឋអាមេរិក​។