កូរ៉េខាងជើង​បិទទំព័រឆ្នាំចាស់​ ស្វាគមឆ្នាំ​ថ្មី ឆ្នាំ ២០២៣​ជាមួយ​ការបាញ់​សាកល្បងមីស៊ីល​បាលីស្ទិក​៣ដើមកាលពី​ថ្ងៃ​សៅរ៍ និងមួយដើមទៀត ​នៅម៉ោង២ភ្លឺថ្ងៃអាទិត្យទី​១​មករា។ តាមកងទ័ពកូរ៉េខាងត្បូង​ មីស៊ីលដែលកូរ៉េខាងជើង​បាញ់នៅព្រឹកថ្ងៃអាទិត្យ​នេះ​ជា​មីស៊ីល​​បាលីស្ទិកចម្ងាយខ្លីបាញ់​ចេញ​ជាយក្រុង​ព្យុងយ៉ាង និង​ធ្លាក់​នៅក្នុងសមុទ្រ​ជប៉ុន។ នៅប៉ុន្មានម៉ោង​ក្រោយ​បាញ់​មីស៊ីល​បាលីស្ទិក ទីភ្នាក់ងារ​ព័ត៌មានរដ្ឋកូរ៉េខាងជើង KCNA​បាន​ចុះផ្សាយ​សេចក្តីថ្លែងការណ៍របស់​មេដឹកនាំ​កូរ៉េខាងជើង លោកគីម ជុងអ៊ុន ដែលនៅក្នុងនោះ​លោកបានបញ្ជា​ឲ្យគេបោះពួយបង្កើន​អាវុធនុយក្លេអ៊ែរឲ្យច្រើនជាងមុន​នៅក្នុងបរិបទ​នៃភាពតានតឹង​នៅឧបទ្វីបកូរ៉េ។