ប្រធានាធិបតីប្រេស៊ីល លោកលូឡា បាន​ធ្វើដំណើរ​ទៅដល់​ទីក្រុង​វ៉ាស៊ីនតោន កាលពី​ថ្ងៃ ព្រហស្បតិ៍ម្សិលមិញ ដើម្បី​ទស្សនកិច្ច​ផ្លូវរដ្ឋ​ជាលើកទី១ នៅបន្ទាប់ពី​ស្បថ​ចូល​កាន់​តំណែង​ កាលពីថ្ងៃទី ១​មករា។ តាម​សេតវិមាន លោក​ប្រធានាធិបតី​ចូ បៃដិន​នឹង​ទទួល​ជួប​លោក​លូឡា នៅថ្ងៃសុក្រនេះ។ ប្រធានាធិបតី​ប្រេស៊ីល មកពីគណបក្ស​សង្គមនិយម ធ្វើដំណើរ​ទៅ​អាមេរិក ដើម្បី កសាង​ទំនាក់ទំនងល្អ​ឡើងវិញ ជាមួយ​អាមេរិក បន្ទាប់ពី​ជាប់គាំង រអាក់រអួល នៅក្រោម​អាណត្តិដឹកនាំ​របស់​ប្រធានាធិបតីប្រេស៊ីល មុន លោក​បុលសូណារ៉ូ។