លោក Vitit MUNTARBHORN អ្នករាយការណ៍ពិសេសទទួលបន្ទុកសិទ្ធិមនុស្សរបស់អង្គការសហប្រជាជាតិប្រចាំកម្ពុជា នឹងមកបំពេញទស្សនកិច្ចជាផ្លូវការនៅកម្ពុជា ពីថ្ងៃទី១៥ដល់ថ្ងៃទី២៦សីហា ដើម្បីជជែកពីបញ្ហាសិទ្ធិមនុស្សជាមួយមន្ត្រីរដ្ឋាភិបាល និងក្រុមអង្គការសង្គមស៊ីវិល។ កំឡុងពេលនៅកម្ពុជា លោក Vitit MUNTARBHORN នឹងជួបជជែកជាមួយតំណាងរដ្ឋាភិបាល អ្នកការពារសិទ្ធិមនុស្ស និងអ្នកពាក់ព័ន្ធទាំងអស់ ដើម្បីវាយតម្លៃស្ថានភាពសិទ្ធិមនុស្សនៅកម្ពុជា។ លោកស្រី ចក់ សុភាព យល់ថាដំណើរទស្សនកិច្ចរបស់លោក Vitit ពេលនេះ ជារឿងល្អ ដែលអាចឲ្យលោកមកអង្កេតនិងស្តាប់មតិរបស់អ្នកពាក់ព័ន្ធដោយផ្ទាល់ ជុំវិញស្ថានភាពសិទ្ធិមនុស្សនៅកម្ពុជា។ ជាយោបល់ លោកស្រី ចក់ សុភាព យល់ថា រដ្ឋាភិបាលក៏គួរបើកទូលាយទទួលយកនូវរបាយការណ៍សិទ្ធិមនុស្សរបស់ក្រុមអ្នកជំនាញ ដើម្បីធ្វើឲ្យប្រសើរស្ថានភាពសិទ្ធិមនុស្សនៅកម្ពុជា។