សវនការលើសំណុំរឿង លោក កឹម សុខា បានបន្តនៅថ្ងៃពុធនេះ​ទៀត គឺជាសប្តាហ៍ទី៣ហើយ នៃការ​បើក​សវនាការ​ឡើង​វិញ ក្រោយ​ពី​ផ្អាកអស់រយៈពេល​២ឆ្នាំកន្លងមក។ ប៉ុន្តែ​សវនាការនៅថ្ងៃនេះ ​ត្រូវបាន​លើក​ទៅ​ធ្វើ​បន្តទៀត​នៅថ្ងៃទី៩​សប្តាហ៍ក្រោយនេះ។ ការ​បន្ត​អូសបន្លាយសវនាការ​ ត្រូវបាន​មេធាវីការពារក្តី​​លើ​ក​ឡើងថា ជា​ចេតនា​អូសពេល​កាន់​យូរ។ ចំណែក​ ការ​លើកឡើងថា បើចង់​ឆាប់​ចប់​ គឺលោក កឹម សុខា ត្រូវ​សារភាព នោះបង្ហាញថា ការចោទ​ប្រកាន់​កន្លង​មក ​គ្មាន​ភស្តុតាង​គ្រប់​គ្រាន់​ទេ។ នេះជាការ​គូសបញ្ជាក់​របស់​លោកស្រី ម៉េង សុភារី។ សហមេធាវីការពារក្តី​ លោក កឹម សុខា រូបនេះយល់ថា ដំណោះស្រាយ ដែល​លឿន​បំផុត គឺតុលាការ​​ទម្លាក់ចោល​បទចោទ​ប្រកាន់​នេះ ដោយសារតែ​នៅមិន​មាន​ភស្តុតាងគ្រប់​គ្រាន់។