December 01, 2024

លោកដូណាល់ត្រាំនឹងនាំយកសង្រ្គាមពាណិជ្ជកម្មមកអង្រួនពិភពលោក?

6 minutes

អនាគតប្រធានាធិបតីអាមេរិក លោកដូណាល់ ត្រាំនឹងចូលកាន់អំណាចជាផ្លូវការនៅថ្ងៃទី ២០មករា ឆ្នាំក្រោយ។ ប៉ុន្តែ នៅបាំងតែ២ខែមុនការចូលកាន់តំណែង ដឹកនាំរដ្ឋបាលថ្មីរបស់អាមេរិក លោកមហាសេដ្ឋី ដូណាល់ ត្រាំបានគំរាមគេឯង មិនថា ប្រទេសសម្ព័ន្ធមិត្ត ឬប្រទេសគូប្រជែងពីរឿងដំឡើងពន្ធលើទំនិញនាំចូលអាមេរិក។ លោកដូណាល់ ត្រាំគំរាមដំឡើងពន្ធលើទំនិញបរទេសនាំចូលទៅអាមេរិក នៅក្នុងគោលដៅទាក់ទាញឲ្យក្រុមហ៊ុនបរទេសទៅវិនិយោគ បោះទីតាំងរោងចក្រនៅទឹកដីអាមេរិក។ ការគំរាមដំឡើងពន្ធលើទំនិញបរទេសក៏ជាមធ្យោបាយរបស់លោកដូណាល់ ត្រាំ ដាក់សម្ពាធទៅលើប្រទេសដទៃឲ្យធ្វើតាមលក្ខខណ្ឌចង់បានរបស់អាមេរិក។ កាណាដា និងម៉ិកស៊ិកផ្ទាល់ប្រទេសជាប់ភូមិរបងជាមួយអាមេរិក ត្រូវលោកដូណាល់ ត្រាំដាក់សម្ពាធខ្លាំងជាងគេឲ្យរឹតបន្តឹង ទប់ស្កាត់ជនអន្តោប្រវេសន៍ខុសច្បាប់ចូលអាមេរិក បើសិនមិនចង់ជាប់ក្នុងដង្កាប់គាបពន្ធរបស់រដ្ឋបាលរបស់លោក។

លោកដូណាល់ ត្រាំធ្លាប់បាននិយាយថា នៅពេលលោកចូលកាន់អំណាច ដឹកនាំអាមេរិកសាជាថ្មី លោកនឹងបញ្ចប់សង្រ្គាមអ៊ុយក្រែន ក្នុងរយៈពេលតែ១ថ្ងៃ។ ប៉ុន្តែ នៅក្នុងអំឡុងពេលរង់ចាំចេញទៅបញ្ចប់សង្រ្គាមរុស្ស៊ីឈ្លានពានអ៊ុយក្រែន លោកដូណាល់ ត្រាំកំពុងធ្វើឲ្យពិភពលោកទាំងមូលព្រួយបារម្ភពីការផ្ទុះសង្រ្គាមពាណិជ្ជកម្ម បន្ទាប់ពីលោកនិយាយគំរាមដំឡើងពន្ធលើរាល់ទំនិញបរទេសនាំចូលទៅអាមេរិក។ គ្មានករណីលើកលែង មិនថា សម្ព័ន្ធមិត្ត ប្រទេសគូប្រជែង ឬប្រទេសជិតខាងដែលធ្លាប់បានចុះហត្ថលេខាដោះពាណិជ្ជកម្ម ដូចជាម៉ិកស៊ិក កាណាដាជាដើម។

នៅសប្តាហ៍មុន នៅលើបណ្តាញសង្គមផ្ទាល់ខ្លួនឈ្មោះ Truth social លោកដូណាល់ ត្រាំសរសេរថា នៅថ្ងៃទី១ដែលលោកចូលកាន់តំណែងជាប្រធានាធិបតី លោកនឹងចុះហត្ថលេខាលើក្រឹត្យមួយចំនួន ដែលនៅក្នុងនោះ មានការសម្រេចដំឡើងពន្ធបន្ថែម២៥%លើទំនិញនាំចូលមកពីប្រទេសកាណាដា និងម៉ិកស៊ិក។ ធ្លាប់បង្កើតជម្លោះពាណិជ្ជកម្មជាមួយចិន នៅក្នុងអាណត្តិដឹកនាំកន្លងមក ពីឆ្នាំ ២០១៧ ដល់ឆ្នាំ ២០២១ លោកដូណាល់ ត្រាំបានអះអាងថា លោកបង្កើនពន្ធ១០%បន្ថែមទៀតលើទំនិញនាំចូលមកពីចិន។

ការដំឡើងពន្ធលើទំនិញបរទេសនាំចូលទៅអាមេរិកជានយោបាយសេដ្ឋកិច្ចអាទិភាពដែលលោកដូណាល់ ត្រាំតែងកត់ចំណាំ លើកនិយាយជាញយដងនៅក្នុងយុទ្ធនាការឃោសនាបោះឆ្នោត។ ចំពោះលោកដូណាល់ ត្រាំ ការដំឡើងពន្ធលើទំនិញនាំចូលអាមេរិកមានគោលដៅ ៣។ ទី១ បានចំណូលបន្ថែមដើម្បីយកទៅប៉ះប៉ូវ បង្រ្គប់ថវិការដ្ឋដែលអាចធ្លាក់ថយចុះ ដោយសារលោកដូណាល់ ត្រាំសន្យាកាត់បន្ថយពន្ធលើប្រាក់ចំណូលរបស់ពលរដ្ឋអាមេរិក។ ទី២ ការដំឡើងពន្ធលើទំនិញបរទេសនឹងអាចញ៉ាំងចិត្តរបស់ក្រុមហ៊ុន រោងចក្រមកបោះទីតាំងវិនិយោគផ្ទាល់ក្នុងទឹកដីអាមេរិក។ ទី៣ ការដំឡើងពន្ធលើទំនិញនាំចូលទៅអាមេរិក ប្រៀបបាននឹងដុំមាសដែលអាមេរិកដាក់នៅលើតុដើម្បីសម្ញែង ដាស់ស្មារតីរបស់ដៃគូចរចា។

ជាក់ស្តែង នៅមិនទាន់ចូលកាន់តំណែងជាផ្លូវការផង លោកដូណាល់ ត្រាំបានប្រើនយោបាយដំឡើងពន្ធលើទំនិញនាំចូលទៅអាមេរិកដើម្បីដាក់សម្ពាធ ទាមទារសម្បទានពីប្រទេសជិតខាង កាណាដា និងម៉ិកស៊ិក។ បើតាមពាក្យគំរាមរបស់លោកដូណាល់ ត្រាំ អាមេរិកនឹងដំឡើងពន្ធ២៥%បន្ថែមទៀតលើទំនិញកាណាដា និងម៉ិកស៊ិក រហូតដល់ពេលណាដែលប្រទេសទាំងពីរទប់ស្កាត់លែងឲ្យមានជនអន្តោប្រវេសន៍ខុសច្បាប់ និងការជួញគ្រឿងញៀនចូលអាមេរិក តាមរយៈទឹកដីម៉ិកស៊ិក និងកាណាដា។

ពាក្យគំរាមរបស់លោកដូណាល់ ត្រាំបានធ្វើឲ្យនាយករដ្ឋមន្រ្តីកាណាដា លោកហ្សុសទីន ទ្រុយដូធ្វើដំណើរទៅជួបលោកដូណាល់ត្រាំ ដោយផ្ទាល់នៅរដ្ឋFlorida ផ្លរីដាកាលពីយប់ថ្ងៃសៅរ៍កន្លងទៅ ព្រោះថា នយោបាយដំឡើងពន្ធរបស់លោកត្រាំនឹងប៉ះពាល់ខ្លាំងដល់កាណាដា ដែលមានទំនិញ និងសេវាដល់ទៅ៧០% នាំចេញទៅអាមេរិក។ នៅថ្ងៃអាទិត្យ លោកដូណាល់ ត្រាំ និងលោកនាយករដ្ឋមន្រ្តីកាណាដាលើកនិយាយពីការពិភាក្សាប្រកបដោយស្ថាបនា ប៉ុន្តែ មិនបានទម្លាយឲ្យដឹងពីលទ្ធផលនៃការជជែកពីរឿងដំឡើងពន្ធរបស់អាមេរិកដែលជាកង្វល់ធំរបស់កាណាដា។ លោកដូណាល់ ត្រាំគ្រាន់តែបញ្ជាក់ថា ភាគីកាណាដានឹងជួយទប់ស្កាត់កុំឲ្យគ្រឿងញៀនមកពីប្រទេសចិន ហូរចូលក្នុងទឹកដីអាមេរិក។

ទប់ស្កាត់គ្រឿងញៀន ក៏ជាលក្ខខណ្ឌដែលលោកដូណាល់ ត្រាំបានយកទៅជជែកជាមួយភាគីម៉ិកស៊ិកដែរ។ នៅ សប្តាហ៍មុននេះ បន្ទាប់ពីនិយាយគំរាមដំឡើងពន្ធលើទំនិញនាំចូលពីម៉ិកស៊ិក ដែលជាប្រទេសជិតខាង លោកដូណាល់ ត្រាំបាននិយាយថា នៅក្នុងកិច្ចសន្ទនាតាមទូរស័ព្ទ លោកស្រី Claudia Sheinbaum ប្រធានាធិបតីថ្មីរបស់ម៉ិកស៊ិកបានសន្យាថា នឹងជួយទប់ស្កាត់កុំឲ្យជនអន្តោប្រវេសន៍ខុសច្បាប់ធ្វើដំណើរឆ្លងចូលទឹកដីអាមេរិក តាមរយៈការបិទព្រំដែនជាមួយអាមេរិក។ ប៉ុន្តែ នៅមួយថ្ងៃក្រោយ មេដឹកនាំម៉ិកស៊ិកបានចេញមកបកស្រាយទាត់ចោលការលើកឡើងរបស់លោកដូណាល់ ត្រាំ ដោយថា ម៉ិកស៊ិកគ្មានជំហរបិទព្រំដែននោះទេ។ ជាច្រកផ្លូវគោកតែមួយទៅកាន់ទឹកដីអាមេរិក ម៉ិកស៊ិកធ្លាប់បានចុះកិច្ចព្រមព្រៀងជួយអាមេរិក ដូចជាទប់ស្កាត់ក្បួនរថយន្តជនអន្តោប្រវេសន៍មកពីអាមេរិកខាងត្បូងកុំឲ្យធ្វើដំណើរដល់ព្រំដែនម៉ិកស៊ិកជាមួយអាមេរិក។ ដោយ គំរាមដំឡើងពន្ធបន្ថែមទៀតលើទំនិញនាំចូលពីម៉ិកស៊ិក អនាគតរដ្ឋបាលលោកដូណាល់ត្រាំ ចង់ដាក់សម្ពាធបន្ថែមទៀតលើ រដ្ឋាភិបាលម៉ិកស៊ិក ដែលបានបញ្ជាក់រួចហើយដែរថា ម៉ិកស៊ិកនឹងចាត់វិធានការវាយបកវិញ ក្នុងករណីដែលអាមេរិកដំឡើងពន្ធលើទំនិញនាំចូលពីម៉ិកស៊ិក។

លោកដូណាល់ ត្រាំ គំរាមដំឡើងពន្ធលើរាល់ទំនិញនាំចូលអាមេរិក ដោយគ្មានលើកលែងប្រទេសណាមួយទេ មិនថា សម្ព័ន្ធមិត្ត ប្រទេសជិតខាង ឬប្រទេសប្រជែងធំដូចជាចិន។ ប្រទេសមួយចំនួន ដូចជា កូរ៉េខាងត្បូង ជប៉ុន ឬសហភាពអឺរ៉ុបដែលកំពុងព្រួយបារម្ភនឹងនយោបាយដំឡើងពន្ធនាំចូល របស់លោកដូណាល់ ត្រាំ បានស្ទុះស្ទារកមធ្យោបាយដើម្បីត្រៀមតបតវិញ។ អឺរ៉ុបអាចចរចា មិនសូវចាញ់ប្រៀបប៉ុន្មាន ព្រោះថា អាមេរិកពឹងខ្លាំងលើឱសថអឺរ៉ុប ហើយអឺរ៉ុបអាចសន្យាទិញបន្ថែមផលិតផលកសិកម្ម និងស្រាវីស្គីរបស់អាមេរិក បើសិនលោកដូណាល់ ត្រាំមិនរករឿងរថយន្តអឺរ៉ុប។ កូរ៉េខាងត្បូង និងឥណ្ឌាវិញអាចលួងចិត្តលោកដូណាល់ ត្រាំ ជាមួយការសន្យាបោះទុនវិនិយោគលើផ្នែកបច្ចេកវិទ្យានៅទឹកដីអាមេរិក។

ប៉ុន្តែ ចំពោះប្រទេសដែលមិនអាចធ្វើសម្បទាន ចុះញ៉មធ្វើតាមលក្ខខណ្ឌចង់បានរបស់លោកដូណាល់ ត្រាំ ពួកគេមានតែមធ្យោបាយតែមួយគត់ គឺការដំឡើងពន្ធលើទំនិញអាមេរិកដើម្បីសងសឹកវិញ។ មហាអំណាចចិនជាដើមបានបញ្ជាក់ហើយថា រាល់ការដំឡើងពន្ធលើទំនិញចិន នឹងទទួលបានវាយបកសងសឹកវិញយ៉ាងចាស់ដៃ។ ចង់ ឬមិនចង់ ពាក្យគំរាមដំឡើងពន្ធរបស់លោកដូណាល់ ត្រាំ កំពុងធ្វើឲ្យគេព្រួយបារម្ភ ពីការផ្ទុះសង្រ្គាមពាណិជ្ជកម្ម នៅក្នុងពិភពលោកសព្វថ្ងៃដែលកំពុងមានសេដ្ឋកិច្ចផុយស្រួយដោយសារសង្រ្គាមអ៊ុយក្រែន ការប្រែប្រួលអាកាសធាតុ និងអសន្តិសុខនៅដើមបូព៌ា អាស៊ី និងអាហ្វ្រិក៕

...more