វិបត្តិសង្គ្រាមនៅអ៊ុយក្រែន បានរំលេចឲ្យឃើញកាន់តែច្បាស់ អំពី​គោលនយោបាយ​ការទូតរបស់ឥណ្ឌា ដែលមានលក្ខណៈជាតិនិយម និង​មិនខ្វល់ពី​តម្លៃ​មនសិកា នៅក្នុងការ​សន្យាជាមួយសហគមន៍អន្តរជាតិ។ ជានិច្ចជាកាល ឥណ្ឌាអះអាង ថាខ្លួនគឺជាដៃគូរបស់​ក្រុមប្រទេសលោក​ខាងលិច ដោយ​ប្រកាសការពារ​ក្របខណ្ឌច្បាប់អន្តរជាតិ សិទ្ធិសេរីភាព និងលទ្ធិប្រជាធិបតេយ្យ។ តែទន្ទឹមគ្នានេះ ឥណ្ឌា គឺជាប្រទេសដែលស្និទនឹងរុស្ស៊ីបំផុតផងដែរ តាម​រយៈ​ការសហការជាច្រើន ទាំងសេដ្ឋកិច្ច និងវិស័យ​​យោធា។​ លោកនាយករដ្ឋមន្ត្រីឥណ្ឌា ណារិន្ទ្រ ម៉ូឌី មានបំណងឲ្យ​ឥណ្ឌា ប្រកាន់គោល​ជំហរ “ពហុបក្សសម្ព័ន្ធ” ពោលគឺត្រូវជាមួយគ្រប់ភាគី ទាំងរុស្ស៊ី ទាំងបស្ចិមលោក​ ឲ្យតែ​កាលៈទេសៈ​ អាចហុចផល​ចំណេញ​មក​ឲ្យ​​ឥណ្ឌា។