ក្រោយ​ភាពមិនប្រាកដប្រជា អស់​ជាច្រើនថ្ងៃ ក្រោយ​ការបោះឆ្នោតសភាមុនអាណត្តិ នៅម៉ាឡេស៊ី កាលពីថ្ងៃសៅរ៍ចុងសប្តាហ៍​កន្លងទៅ នៅ​ទីបំផុត ព្រះចៅស៊ុលតង់ម៉ាឡេ បានសម្រេចតែងតាំងលោក​អាន់វ៉ា អ៊ីប្រាហ៊ីម ឲ្យធ្វើជានាយករដ្ឋមន្ត្រី​ និងដឹកនាំរដ្ឋាភិបាលចម្រុះ។ សម្ព័ន្ធគណបក្សរបស់​លោក អាន់វ៉ា អ៊ីប្រាហ៊ីម បាន​ទទួលបានចំនួន​អាសនៈច្រើនជាងគេ ក្នុងការបោះឆ្នោត បើទោះបីជាមិនមានសំឡេងភាគច្រើនក្នុងសភា។ នេះគឺជា​ជោគជ័យ​ធំចុងក្រោយ​បង្អស់ សម្រាប់ជីវិតនយោបាយ​យ៉ាងត្រដាបត្រដួស​របស់​លោក អស់រយៈពេល​ជិត៤០ឆ្នាំកន្លងមកនេះ​ ក្នុងនាម​ជាអ្នកនយោបាយ​​ប្រឆាំង​ដ៏មានប្រជាប្រិយបំផុត ហើយ​ក៏ធ្លាប់ត្រូវតុលាការផ្តន្ទាទោស ឲ្យ​​ជាប់ពន្ធនាគារច្រើនដងទៀតផង។​