Nanome modely azo ampiharina, ara-pifandraisana sy ara-teolojika momba ny fanambadiana i Petera; Kristy sy ny Fiangonana. Ny olana voalohany amin’ny fanambadiana Kristiana dia ny lehilahy izay tsy handray ny andraikiny amin’ny fikarakarana ny vady aman-janany tahaka ny niahian’I Kristy ny Fiangonana. I Petera dia mampiseho an’I Jesoa Kristy ho Ilay Mpiandry Lehiben’ny Fiangonana. Apetrak’Andriamanitra amin’ny lehilahy ny andraikitry ny fanambadiana sy ny tokantrano. Araho ny modely omen’ny Baiboly amin’ny fifandraisanao rehetra ary avelao Andriamanitra hanefy anao araka ny maha-izy azy anao.

Nanoratra ho an’ireo Kristiana Jiosy niely nanerana an’i Azia Minora i Petera, izay nijaly sy nenjehina. Fantatr’i Petera fa hiharatsy ny fanenjehana. Raha niresaka ny fijalian’izy ireo i Petera, dia tsy nampianatra ny teolojian’ny fahombiazana. Nanazava ny antony amelan’Andriamanitra ny vahoakany hijaly i Petera. Niresaka momba ny fifidianana sy ny fahaterahana indray izy. Araka ny voalazany, dia misy zavatra toy ny hoe torontoronina ara-panahy, vanim-potoanan'ny fitondrana vohoka ary ny krizin'ny fahateraham-baovao.

Ao amin’ny Testamenta Vaovao isika dia mahita Petera telo samy hafa, nefa lehilahy iray ihany. Ao amin’ny Filazantsara dia atao hoe Simona no anarany, olona tsy mahatombona, mafana sy mangatsiaka ary olona mora mikoropaka, fa Jesosy kosa niantso azy hoe Petera, vatolampy; tao aorian’ny Pentekosta dia mahita an’i Petera izay feno hery isika; farany dia i Petera antitra sy hendry, izay apostolin’ny fanantenana. Te hampahery sy hampionona an’ireo olona ireo amin’ny fahoriany izy. Ny tena fahafantarana an’Andriamanitra amin’ny alalan’I Jesosy Kristy no lohahevitra resahiny.

Ny lohahevitry ny epistily nosoratan’i Jakoba rahalahin’I Jesosy dia ny fanamasinana izay mitondra ny fiainana sy ny asa fanompoana. Izay tena inoanao dia ataonao. Resaka fombafombam-pivavahana fotsiny ny ambiny. Ny asa dia ampahany manan-danja amin'ny finoana velona, toy ny fofonaina ho an'ny vatana velona. Nilaza amintsika i Jakoba fa ny fiverenan’i Jesoa Kristy fanindroany indray no ho vahaolana farany amin’ireo olana rehetra misy eto an-tany. Nilaza i Jakoba fa tokony hanala ny saron-tavantsika isika ary ho marina anatin’ny fifandraisana.

I Jakoba dia milaza amintsika ny momba ireo loharano sy ny filaharan’ny fanamasinana. Jesosy sy Jakoba dia mampianatra fa ny vahaolana amin’ny ota, eny fa na dia ny ota ara-nofo aza, dia ny Soratra Masina satria velona sy mahery ny Tenin’Andriamanitra. Asongadin’i Jakoba fa zava-dehibe ny mankatò sy mampihatra ny Tenin’Andriamanitra eo amin’ny fiainantsika. Nifantoka tamin’ny loharanon’ny fifehezan-tena i Jakoba ary tsy maintsy fehezina tanteraka ny lela hoy izy. Tokony hitondra ny fiainantsika eo ambany fifehezan’ny fahendren’Andriamanitra isika, fa tsy ny fahendren’ny tany.

Ny Epistilin’i Jakoba, epistily tena mora ampiharina, dia nantsoin’ny sasany hoe Ny bokin’ny Ohabolana ao amin’ny Testamenta Vaovao. Toy ny fanehoan-kevitra mihazakazaka momba ny fampianaran’I Jesosy Kristy izy io, indrindra fa ny Toriteny teo an-tendrombohitra. I Jakoba dia milaza amintsika ny momba ireo loharano sy ny filaharan’ny famonjena. Niresaka momba ny fijaliana i Jakoba ary milaza fa tokony ho isaina ho fifaliana avokoa izany, rehefa miatrika ireo fakam-panahy ireo ianao. Tokony handray tsara ny fitsapana antsika isika amin'ny maha-namana antsika satria afaka miteraka fahamatoran-toetra ara-panahy izany.

Hoy ny Hebreo amin'izay kivy sy enjehina: Aza manary ny finoanareo, fa vavolombelona maro be toy ny rahona no manodidina antsika! Ny Hebreo toko fahiraika ambin'ny folo dia fantatra amin'ny anarana hoe tokon’ny finoana, ary manome antony tokony hifikirantsika amin'ny finoantsika izy. Ny finoana dia mamonjy sy manome toky ny fanantenantsika. Tsy maintsy miaina amin’ny finoana isika. Manome ohatra maro momba ny dikan’ny finoana sy ny mety ho vitan’ny finoana ny mpanoratra. Ny mpanoratra dia mamarana amin’ny fananarana mba hankatoavantsika ireo mpiahy antsika ara-panahy.

Ny Bokin’ny Hebreo dia feno fananarana sy fampitandremana momba ny fihemorana misoko. Ny tanjon’ny boky koa dia ny hanesorana ny fanomezan-toky diso ho an’ireo izay mbola tsy nanao fanoloran-tena tamin’ny finoana. Mifananara isan'andro, dieny izao anio izao, fandrao hisy ho mafy fo amin'ny famitahan'ny ota ianareo. Ny fananarany manontolo dia miantefa amin’ireo mitonona ho mpino izay tsy mbola nateraka indray noho ny tsy fananany ny finoana mahavonjy ao amin’I Jesoa Kristy.

Ny Hebreo, ilay sangan'asa mistery, mihoatra noho ny boky hafa rehetra ao amin'ny Baiboly, dia mampifandray ny Testamenta Taloha sy Vaovao. Ny Bokin’ny Hebreo dia manolotra an’I Jesosy Kristy ho Mesia izay nambara mialoha tao amin’ny Testamenta Taloha, ho Tompo araka ny voaseho ao amin’ny Testamenta Vaovao, Ilay Mpanjakan’ny mpanjaka izay ho avy indray. Iray amin’ireo lohaheviny ny resaka finoana ary misy teny fototra telo: ny tsara kokoa, minoa ary mitandrema, ireo no mitarika ny fandalinantsika.

Ao amin’ny Timoty Faharoa, i Paoly dia mampahatsiahy an’i Timoty ny fampianarana efa azony. Nampianatra i Paoly fa Andriamanitra dia manana drafitra manokana momba ny hoe iza, inona ary aiza no tokony hisy antsika. Hery velona ny Soratra Masina, mitondra fahaterahana indray ary manorina izay nateraka indray. Hoy i Paoly: Efa niady ny ady tsara aho. Nahatanteraka ny fihazakazahako aho. Nihazona ny finoana aho ary nitoetra ho marina Taminy. Nandresy ny ady aho ary azoko ny satroboninahitry ny mpandresy.