Amin’ity lesona ity isika dia mandinika ny taratasin’ny apostoly Paoly farany. Rehefa nanoratra ny taratasiny faharoa ho an’i Timoty i Paoly dia fantany fa fohy ny androny. Nampiasa fanoharana momba ny miaramila sy ny mpihazakazaka ary ny mpamboly i Paoly mba hanamafisany ny asa feno fifehezana sy sarotra ary feno faharetana, amin’ny fiainana ny Filazantsara sy amin’ny maha-mpianatr’I Jesosy Kristy. Misy fitsipi-piainana ao amin’I Kristy, ary ny iray amin’izany dia ny tsy maintsy hitondranao ny hazo fijalianao ary ho vonona hanaraka sy hijaly ho Azy.

Filemona no fahefatra amin’ireo epistilin’i Paoly tao an-tranomaizina, taratasy fohy sy mavitrika nentin’i Onesimosy teny an-tanany rehefa niverina tany amin’ny tompony, mpino nanankarena izy. Na dia taratasy fohy aza, dia lava amin'ny fampiharana ara-tsosialy sy ny fiantraikany ara-tsosialy ny epistily ho an’ny Filemona. Toa zava-dehibe amin’i Paoly ny nanaovan’Andriamanitra antsika ho olon’ny safidy izay manao safidy an-tsitrapo. I Jesoa Kristy irery ihany no Vahaolana amin’ny olana ara-pifandraisana anantsika na ny olantsika manokana..

Nampitandrina an’i Timoty tamin’ny fitiavan-karena i Paoly ary nampianatra fa ny toe-panahy araka an’Andriamanitra ny amin’ny fahafaham-po dia tombony lehibe. Nanome teny fananarana ho an’ny mpanankarena i Paoly: Mifehy ny harena ve ianao sa ny harena no mifehy anao? Eo anelanelan’ny fisehoan’I Kristy voalohany tamin’ny fahatongavan’ny famonjena sy ny ho fisehoany fanindroany amin’ny fiverenany, dia misy ny fisehoan’Andriamanitra amin’ny alalanao sy amin’ny alalako, izay olony manokana. Ny zavatra tiana asongadina ao amin’ny taratasin’i Paoly ho an’i Titosy dia ny hoe ny fiahiana araka an’Andriamanitra dia mitaky mpiahy araka an’Andriamanitra.

Toy izao no hanambaran’i Paoly ny Filazantsara: Iray ihany no Mpanalalana amin’Andriamanitra sy ny olona. Tahaka an’I Kristy manara-maso sy miahy ny Fiangonana, dia tahaka izany koa, ny lahy dia tokony hiahy sy hanara-maso ny vadiny sy ny ankohonany, ary ny lehilahy dia tokony hanara-maso na hiandry ny fiangonana. Omen’ny Baiboly mazava tsara ho an’ilay lehilahy ny andraikitra ho mpitarika ny tokantrano sy ny fiangonana. Notanisain’i Paoly ny fepetra takiana ho an’ny mpitarika ara-panahy. Mampianatra antsika handrefy ny fiainantsika amin’ny alalan’ny Tenin’Andriamanitra i Paoly.

Rehefa mandinika ny Bokin’i Timoty Voalohany, Timoty Faharoa ary Titosy isika, dia miditra ao amin’ny Epistily Pastoraly. Ny fifandraisan'i Paoly/Timoty dia modely ho an'ireo mpitandrina zokiny sy mpitandrina zandriny aman-hetsiny teo amin’ny tantaran'ny fiangonana. Ny Timoty faharoa 2:2, dia miompana amin’ny karazana fanabeazana tsy azo soloina: mampianatra olona mahatoky izay afaka mampianatra olon-kafa ihany koa. Nohamafisin’i Paoly ny toetra tokony hananan’ireo olona izay hitarika ao amin’ny fiangonana.

Ao amin’ny Tesaloniana i Paoly dia milaza fa ho avy I Jesosy Tompo ary tokony ho eo am-perinasa isika raha miandry ny fiverenany; tsy mitsahatra mivavaka, ka misaotra mandrakariva. Na dia tsy fantatsika aza ny fotoana hiverenan’I Jesosy, dia nilaza Izy fa misy famantarana fotoana mila jerena. Ao amin’ny Tesaloniana Faharoa, i Paoly dia manazava momba ny Andron’ny Tompo izay ho avy rehefa omena fahefana malalaka amin’ny tany i Satana alohan’ny fitondran’I Jesoa Kristy arivo taona.

Ny lohahevitry ny taratasin’i Paoly voalohany ho an’ny Tesaloniana dia ny Fiverenan’I Jesosy Kristy fanindroany indray. Zava-dehibe ny mahatakatra fa ny Fiavian’I Jesoa Kristy fanindroany indray dia tsy fisehoan-javatra iray fa andiana tranga maromaro. Ho hitantsika ny fomba nampirisihan’i Paoly ny Tesaloniana ny amin’ny fampiakarana ny fiangonana sy ny fiavian’I Jesosy Kristy Tompo fanindroany. Nanoratra i Paoly fa ny zavatra voalohany hitranga rehefa tonga ny fampiakarana ny fiangonana dia ny maty ao amin’I Kristy aloha no hitsangana.

Ny Bokin'ny Kolosiana no sangan'asan'i Paoly miresaka ny amin’Ilay Kristin’ny fiangonana: Iza moa I Kristy? Inona no nataony sy ny maha ampy Azy? Nanana olana lehibe 3 ny fiangonana tao Kolosia: fanoherana ara-filozofika ny maha-Andriamanitra an’i Jesosy Kristy, fanenjehana ara-pahalalana tamin’ny finoan’ny olona, ary nisy Jiosy nametraka lalàna ho an’ny fiangonana. Nohamafisin’i Paoly fa tena Andriamanitra tokoa I Kristy. Nangataka ny mpino i Paoly mba hivavaka mafy, amin’ny fisaorana.

Manana ny fiadanan'Andriamanitra tsy tapaka ve ianao? Raha tsy izany, dia tsy tokony hahagaga na handiso fanantenana anao raha tsy mihaona amin’ny fepetran’Andriamanitra ianao. Ao amin’ny Filipiana 4 i Paoly dia mampianatra antsika fepetra roa ambin’ny folo ho an’ny fiadanan’Andriamanitra: Aza manahy, mivavaha amin'ny zavatra rehetra, mieritrereta zavatra tsara, manaova ny marina, mankasitràha, manàna laza tsara amin'ny fahalemem-panahy, manàna faharim-po, maneke ny toe-javatra mitranga aminao, miandrandrà, mifalia ao Aminy, omeo lanja ny faneken’Andriamanitra, ary tonio ao amin’I Kristy ny fonao sy ny sainao.

Ny lohahevitry ny Filipiana dia ny Fiainana ao amin’I Kristy amin’ny alalan’ny fiombonana. Aoka ho ao anatinao io saina io. Nohamafisin’i Paoly ny maha zava-dehibe ny fanetretena eo amin’ny fiombonan’ny mpino, ary ny fiheverana ny hafa ho ambony noho ny tena. Mampianatra izy fa afaka mahafantatra sy manatanteraka ny sitrapon’Andriamanitra izay tsara sy tonga lafatra ho an’ny fiainantsika isika. Hoy koa i Paoly: Izao zavatra iray loha izao no ataoko: manadino ny lasa, ary miezaka hanatratra izay eo aloha.