Soms staan die wêreld met sy gatkant na jou toe. So gaan dit met Eben de Jager. En hoe Eben ook al verduidelik, sake word net erger. Dis of dié donker wolk nie vir ’n silwer randjie bestem is nie.

Aletta de Jongh ontmoet uiteindelik vir Anton de Villiers. Sy is verbaas hoe goed die jong man haar familie ken. Patricia de Villiers is nou maar eenmaal net te nuuskierig van geaardheid. Sy bearbei Aletta om haar geheime met haar te deel.

Theuns Malan kry nie rigting nie. Hy word volledig ingelig oor die geskiedenis van die rooi motor. Maar deur wie? Vir wie het Simon Setúke eers gewerk? En wat het in die hospitaal gebeur?

’n Verdwaalde motor laat Theuns Malan met baie onbeantwoorde vrae. Wie se motor is dit? Wie het dit parkeer, die sleutels in die motor gelos en weggestap… in Suid-Afrika van alle plekke.

Klein Maggie Kotze se tekening vertel ’n veelseggende storie: van kindertjies wat sonder skooltassies by die skool opdaag en ’n kind wat van haar skoolkos in ’n plastieksak krap om dit huis toe te vat. Hoe kan Aletta de Jongh anderpad kyk met hierdie inligting?

Om iets goeds te doen is nie noodwendig altyd die regte ding om te doen nie. Griet Kotze sukkel om dit te verstaan. Iets dramaties gebeur wat Patricia de Villiers se geloof tot die uiterste toe beproef.

Iemand daag onverwags en ongenooid by Jan Horn se vergadering op en dit het gevolge. Theuns Malan en sy halfbroer, Eben de Jager, kom nog steeds nie klaar nie. Waaroor gaan die geveg hierdie keer?

’n Man mag mos maar groot droom. Wie is vol planne vir die toekoms? Hadida Security Services speel ’n al hoe groter rol in sommige van die hoofkarakters se lewens. Jan Horn reël ’n vergadering wat ’n gefladder afgee.

Elmari Neethling kry vir die eerste keer kans om vir Aletta de Jongh haar trots, Touch of Lavender, te wys. Vir wie het Elmari in haar laaste saak verteenwoordig en in die hof verdedig, net voor sy haar prokureursfirma verkoop het? Dis ’n belangrike skakel na die ontknoping van ’n duistere string gebeure.

Reëls is nooit ’n probleem vir dié wat aan die regte kant daarvan leef nie. Maar dit kan diegene aan die verkeerde kant daarvan pootjie en opstandig maak. Wie moet hierdie waarheid leer? ’n Gevaarlike situasie noodsaak dat Môregloed Kleuterskool ’n nuwe sekuriteitsman moet kry.