នាថ្ងៃចន្ទ ទី​១០កក្កដា ប្រធានាធិបតីសហរដ្ឋ​​អាមេរិក លោក ចូ បៃដិន បំពេញទស្សនកិច្ចរយៈពេលខ្លី នៅក្នុងប្រទេសអង់គ្លេស មុននឹងបន្តដំណើរទៅចូលរួមកិច្ចប្រជុំកំពូលអង្គការអូតង់ នៅក្នុងប្រទេស លីទុយអានី ចាប់ពីថ្ងៃអង្គារ។ នៅ​រាជធានីអង់គ្លេស​ លោក ចូ បៃដិន នឹង​ចូល​គាល់​ព្រះ​មហាក្សត្រ​ ឆាលស៍ ជា​លើកទី១​ ក្រោយ​ពី​ព្រះអង្គ​ទ្រង់​ឡើង​គ្រង​សោយរាជ​សម្បត្តិ។​ ទន្ទឹម​នឹង​គ្នា​នេះ​ ប្រមុខ​ដឹកនាំនយោបាយ​​នៃ​ប្រទេស​ពីរ ក៏​នឹង​​ជជែក​ពិភាក្សាគ្នា​​អំពីសំណុំ​រឿង​ទ្វេភាគីផង​ ហើយ​និង​សំណុំ​រឿង​អន្តរជាតិ​សំខាន់ៗផ្សេងទៀត​​ផង​ ពិសេស​អំពី​ការ​ចូល​ជា​សមាជិក ​របស់​​អ៊ុយក្រែន​ ទៅក្នុង​​អង្គការអូតង់។​