Sche uffants e giuvenils chantan è quai insatge tut aparti. En quest'emissiun dattan vuschs giuvnas dal Grischun, da la Svizra ed era d'autras terras insaquantas chanzuns en differentas linguas.

I dat puspè in nov disc cumpact cun chanzuns per uffants. «Hoppelihop» cuntegn 20 chanzuns per uffants tranter quatter ed otg onns. Ina u l'autra chanzun dal disc pudess chattar la via en il repertori dad in dals chors d'uffants e giuvenils dal Grischun. Perquai chantan en l'emissiun dad oz bain inqual da quels chors.

Tuttina con ditg ch'i plova u naiva insacura turna il sulegl. Suenter dis suleglivs s'avischinan puspè nivels ed il ciclus cumenza danovamain. «Noss Chors» han per mintga eventualitad la dretga chanzun. In di plovi u naivi tge ch'i po in'auter e l'entira cuntrada cuvert da tschajera grossa e tuttenina vegn il sulegl ora. Uschè variant sco l'aura èn era las chanzuns da «Noss Chors». Uschia chantan els dal sulegl, dal vent mabain era da la malaura, plievgia e naiv.

Gia è l'emprima dumengia d'advent vargada. L'entir conturn è decorà e las chandailas sin il tschupè traglischan. Da «Noss Chors» datti oz anc la dretga musica per stgaffir plaunet atmosfera da Nadal. Il temp d'advent duess esser in temp da ruaus e reflexiun, il temp da preparaziun per Nadal. «Noss Chors» chantan oz per vus insaquantas chanzuns da Nadal per stgaffir in'atmosfera ruassaivla e paschaivla. Emblidai per quell'ura tut ils regals n'anc betg cumprads e las decoraziuns n'anc betg plazzadas. Giudai e ruassai.

Avant 20 onns è Gion Duno Simeon mort. «Noss Chors» sa regorda dal cumponist e dirigent e preschenta chanzuns ord la plima dal renumà Surmiran. Oz ans regurdain nus d'in chantadur, dirigent ed oravant tut cumponist surmiran: Gion Duno Simeon, naschì ils 30 d'avust 1906 e mort ils 26 da november 2000. El n'ha betg mo cumponì radund 150 chanzuns e dirigì differents chors. El è medemamain era stà in grond cumbattant per la lingua rumantscha – en spezial per il surmiran. Vus pudais tadlar tuns originals da Gion Duno Simeon ord l'archiv da RTR, accumpagnà da sias cumposiziuns.

L'atun è il temp che tut vegn pli calm. La natira sa prepara per l'enviern durant ch'ils dis daventan pli curts. Per accumpagnar quest temp chantan «Noss Chors» oz tocs ruassaivels. Ils dis vegnan pli curts e tut enturn ins daventa in pau pli ruassaivel. Igl è il temp da las davosas racoltas ed il temp che la muaglia banduna cun lur pasturs l'alp. Ina stagiun fitg bella e contemplativa. Perquai chantan «Noss Chors» en l'emissiun dad oz tocs ruassaivels, paschaivels u meditativs.

Mintgina e mintgin é la summa da sias experientschas. «Noss Chors» chantan oz da regurdientschas e sa regordan dal temp passà. Era sche gronds eveniments – sajan quels positivs u negativs – stattan pli fitg en memoria èsi tranteren las chaussas pitschnas da las qualas nus ans regurdain il pli gugent. Oz laschan «Noss Chors» reviver muments passads. Els sa regordan d'eveniments da l'uffanza, dal temp communabel cun persunas impurtantas u simplamain da schabetgs legraivels da la vita.

En in chor sa scuntran carstgauns da tuttas clamadas. Cuminaivel han els il plaschair dal chant. En l'emissiun dad oz chantan els da diversas clamadas e professiuns. Saja quai il lainari, la pura, il spazzachamin ubain la pastura. Ils ins lavuran sin la pastgira, ils auters en lavuratori e puspè auters sesan en biro. Tuts vegnan ensemen per chantar. En l'emissiun dad oz chantan «Noss Chors» da diversas professiuns – forsa era da la vossa.

La baselgia catolica festivescha l'entschatta november Numnasontga ed ils dis da las olmas. Durant quels dus dis vegn sa regurdà dals sontgs e defuncts cun far uraziun e cun rugar per els. L'entschatta da november sa regorda la baselgia catolica da ses sontgs e defuncts. L'emprim da november celebrescha ella tut ils sontgs. Perquai ch'i na dat betg avunda dis durant l'onn per mintga sontg vegnan els onurads tuts per la festa da Numnasontga. Ils dus da november, il di da las olmas, sa regordan ils catolics da lur defuncts. «Noss Chors» chantan oz chanzuns en memoria da tut ils sontgs e da las olmas.

Co chantan ils chors ordaifer la Svizra? Si en il nord da la Scandinavia ubain vi sur mar en l'America? En l'emissiun dad oz vulain nus chattar ora quai. Noss Chors chantan oz en differentas linguas e da tut differents temas. La glisch polara è per exempel il tema da la chanzun dal chor «Cantus» da la Norvegia. Il chor american «The Golden Gate Men's Chorus» han lur num da la punt famusa a San Francisco, chantan dentant russ. Ed il «Stellenbosch University Choir» da l'Africa dal sid interpreteschan ina chanzun da pop da la chantadura Christina Aguilera.

Zitga, maila u tirc – l'atun è era il temp da racolta. In temp che dat blera lavur en curtin e sin ils ers. Cun musica da Noss Chors va la racolta gist in pau pli simpla. En l'emissiun dad oz chantan Noss Chors da l'atun ed en spezial da la racolta. Chanzuns che duajan far la lavur in zic pli simpla ubain accumpagnar la festa suenter la racolta gartegiada. Per quai intent chantan tranter auter il chor viril Trun «Scuder scudein nus» ed il chor viril da Lantsch «Taimp da raccolta».