Primavaira 2018 ha Christoph Cajöri dà ses 6avel concert cun la Ligia Grischa.

Per cumpensar in zichel quai temp senza concerts e festas da chant en natira, emetta RTR en l'emissiun «Noss chors» ina seria da concerts ord noss archiv. L'entschatta dat la Ligia Grischa. «Romontsch – Romantic»: sut quel motto ha Christoph Cajöri tschentà il concert 2018. Cooperà ha il pianist polac, che viva e lavura a Bern, Pawel Mazurkiewicz. Dals 27 da matg 2018 datescha nossa registraziun, fatga a Glion en la baselgia claustrala.

Sin il program stattan chanzuns da Benedetg Dolf, Gion Giusep Derungs, Gion Balzer Casanova, Franz Schubert, Edvard Grieg e Jean Sibelius. Latiers interpretescha il pianist ovras da Benedetg Dolf, Franz Schubert ed Edvard Grieg.

Las chanzuns en l'emissiun dad oz èn blau-alv-cotschnas. «Noss Chors» fan in viadi tar noss vischins en Frantscha.

Tar Frantscha vegn forsa sco emprim endament baguettes, chaschiel, vin cotschen ubain la Tour Eiffel. Però era la musica ed il chant franzos fan gust ed impressiun. Perquai chantan «Noss Chors» en l'emissiun dad oz mo franzos. Per exempel chanta il Chor svizzer da giuvenils «A toi mon père» ubain il chor da chombra da l'universitad da Friburg «Amour des Mères». Cun quellas ed anc bleras autras chanzuns pudais far tar vus en stiva in viadi tras la Frantscha.

Oz sa drizzan «Noss Chors» a las bleras valladas e lieus dal Grischun cun lur abitants.

Oz van «Noss Chors» sin in viadi atras l'entir Grischun. Els sa ferman en differents lieus. Saja quai cun far ina curta visita en Val Lumnezia e contemplar las scleridas dal sulegl, sa fermar en il «pign Sevgein» en Surselva, far in paus e baiver in punsch chaud sin mises a Cuira ubain cuntinuar il viadi en l'Engiadina e giudair la survista sin il «Piz Uter».

Ils 15 d'avrigl sa Gion Giusep Derungs festivar ses 89avel anniversari.

Chors rumantschs portan omagi ad in dals impurtants cumponists e dirigents rumantschs insumma: Professer Gion Giusep Derungs, naschì ils 15 d'avrigl 1932 a Surcasti. Cun numerusas cumposiziuns e sco dirigent ha Gion Giusep Derungs marcà fitg ferm il chant da chors en ed ordvart il Grischun. Per ses 89avel anniversari porta l'emissiun NOSS CHORS omagi al giubilar lumnezian cun laschar chantar ils chors virils: Surses, Lumnezia, Ligia Grischa e Laax ed il maschadads: Surmeir, Suraua, Surselva, cantus firms surselva ed il scolars secundars da Vella. Ils intermezzos vegnan dal Calamus Trio e da lAlena Cherny al clavazin.

Redacziun: Giusep G. Decurtins

Ils radis dal sulegl che stgaudan, la flomma d'ina chandaila che dat in'atmosfera speziala ubain la glisch misteriusa da la glina. En l'emissiun dad oz chantan «Noss chors» da la glischur.

Bain inqual ha gia guardà en il tschiel la saira, intgantà da la glischur da las stailas. Ubain sa legrà da la levada dal sulegl ina damaun baud. La glisch fascinescha, è agid e dat confiert. Perquai tractan era bleras poesias quest tema. Ed ussa cura ch'ils dis vegnan puspè pli lungs e clars portan era Noss Chors in pau glisch e chalira tar vus en stiva.

Dumengia passada ha l'emna sontga entschet. Perquai chantan «Noss Chors» oz chanzuns da Pasca.

L'emna sontga cumenza cun la dumengia da palmas, l'entrada da Jesus a Jerusalem. Silsuenter suonda la gievgia sontga, cura che Jesus ha festivà la sontga tschaina e lavà ils pais als 12 giuvnals. In di suenter, da venderdi sontg, è el lura ì la via da la crusch ed è vegnì crucifitgà. La sonda sontga suonda il di dal ruaus da morts e la dumengia da Pasca è Jesus levà da mort en vita.

En l'emissiun dad oz chantan Noss Chors per accumpagnar il temp da Pasca.

Sch'ins banduna la patria èsi bel da savair prender cun insatge che regorda vid il dachasa. Per bain inqual è quai la lingua ed il chant.

Bleras Rumantschas e blers Grischuns bandunan lur patria. Saja quai pervia la scolaziun, la lavur, l'amur ubain be per far vacanzas. Sin lur viadis èn els savens era accumpagnads da l'encreschadetgna. Perquai è quai tema er adina puspè da chattar tar la musica rumantscha. In pitschen toc patria han ils Grischuns dal cor chattà en chors rumantschs da la bassa. En l'emissiun dad oz vulain perquai tadlar registraziuns da chors rumantschs e grischuns da Turitg, Berna, Lucerna, Son Gagl e Zug.

En blers lieus stendan las emprimas fluras da primavaira lur chaus vers il sulegl. Ed uschia sco las fluras auzan era ils chors lur vuschs en nossa emissiun.

Per blers è quai il temp da ventira. Igl è il temp da colurs, flurs e da la natira che sa dasda. Durant las spassegiadas pon ins guardar brunsinas, mintgilettas, primulas ed anc bler autras fluras. Accumpagnadas vegnan quellas bellas vistas da las melodias dals utschels, ed oz da quellas da «Noss chors». Imnis a la primavaira ed a las flurs.

Vegnir ord letg baud la damaun anc avant la levada dal sulegl n'è betg per mintgin. Il cotschen da la damaun è dentant adina puspè in spectacul che vala la paina da vesair.

Il cotschen da la damaun – l'aurora – è in spectacul da la natira ch'ins po observar curt avant la levada dal sulegl. Cotschen da la damaun fa puz e paltaun di il proverbi. Sch'il tschiel traglischa en diversas colurs è quai dentant emblidà per in mument. Perquai dechantan «Noss Chors» oz l'aurora e la damaun marvegl.

En l'emissiun dad oz chantan Noss Chors dal fieu dal sulegl, da l'aua en il lajet alpin e dals culms che tanschan fin ils nivels en l'aria.

En l'emprima part da quest viadi musical tras ils elements sa deditgeschan Noss Chors al element fieu. Tranter auter chanta il chor mischedau da Castrisch «Ti Fiug» ed il cor viril-baselgia Savognin «Rasvegl». Suenter il fieu suonda l'aua cun il chor masdo da Surmeir ed «Il laiet alpin». Il chor da giuvenils Grischun maina nus lura en l'aria cun «trag mi Wind». A la fin sa tschentain puspè sin terra e tadlain il chor viril Alpina che chanta da «Nos cuolms».