នៅ​ថ្ងៃ​ចន្ទ ទី២៤ មករា អ៊ីរ៉ង់​បាន​ប្រកាស​ឲ្យ​ដឹង​ជា​លើក​ទី១ ពី​ជំហរ​ចង់​ចរចា​ផ្ទាល់​ជាមួយ​អាមេរិក។ អាមេរិក​បាន​ផ្តល់​ចម្លើយ​វិជ្ជមាន​ភ្លាមៗ​ដោយ​ប្រកាស​ពី​ជំហរ​ត្រៀម​ខ្លួន​ចរចា​ផ្ទាល់​ជា​មួយ​អ៊ីរ៉ង់។ គួរ​បញ្ជាក់​ថា តាំង​ពី​ខែ​មេសា​ឆ្នាំ ២០២១ មក​ដល់​ថ្ងៃ​នេះ កិច្ចចរចា​ដើម្បី​ស្រោចស្រង់​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ ២០១៥ បាន និង​កំពុង​បន្ត​ធ្វើ​តែ​រវាង​អ៊ីរ៉ង់ និង​ក្រុម​ប្រទេស​ហត្ថលេខី​ផ្សេង​ប៉ុណ្ណោះ។ ចំណែក​អាមេរិក​ដែល​អតីត​ប្រធានាធិបតី​លោក​ដូណាល់ ត្រាំ​បាន​ដក​ខ្លួន​ចេញ​ពី​កិច្ចព្រមព្រៀង​កាល​ពី​ឆ្នាំ ២០១៨ បាន​ចូលរួម​ដោយ​ប្រយោល។