Ármann Höskuldsson ræðir við Spegilinn um stöðuna á Reykjanesskaga eftir að sjötta eldgosið á Sundhnúksgígaröðinni hófst í gærkvöld. Verulega hefur dregið úr krafti gossins en Ármann telur tímabært að skoða varnir fyrir Reykjanesbraut og Voga.

Bjarnaveiðitímabilið byrjaði í Svíþjóð á miðvikudag. Samkvæmt vefsíðu Sænsku rándýrasamtakanna, sem láta sig velferð, viðgang og afkomu rándýra landsins varða, voru yfir hundrað birnir felldir strax á fyrsta degi og í gær féllu rúmlega fimmtíu til viðbótar.

Ólympíumót fatlaðra verður sett í París í næstu viku. Ísland á fimm keppendur á mótinu. Þar með er ekki öll sagan sögð því átján keppendur verða á hlaupafótum frá íslenska stoðtækjafyrirtækinu Össuri. Spegillinn settist niður með Hildi Einarsdóttur, framkvæmdastjóra þróunarsviðs hjá Össuri.