ប្រធានាធិបតី អេមីរ៉ាតអារ៉ាប់រួម ព្រះអង្គម្ចាស់ ម៉ូហាម៉េដ បេន ហ្សាយេដ ឬ​ហៅ MBZបាន​យាង​ទៅដល់​ទីក្រុង​ប៉ារីស កាល​ពី​ថ្ងៃ​អាទិត្យ ទី ១៧កក្កដា ដើម្បី បំពេញទស្សនកិច្ច​ផ្លូវរដ្ឋ ៣​ថ្ងៃ នៅប្រទេស​បារាំង។ នៅថ្ងៃ​ចន្ទ​នេះ ប្រមុខរដ្ឋប្រទេស​មហាសេដ្ឋីប្រេង​ត្រូវ​ជួបពិភាក្សា​ជាមួយ​ប្រធានាធិបតីបារាំង លោក​អេម៉ានុយអែល ម៉ាក្រុង មុន​ពិធី​លៀង​សាយភោជន៍ នៅរាជវាំង វែរសៃ Versaille។ ប្រធានាធិបតី​បារាំង ក្រាលកម្រាលព្រំក្រហម ទទួល​យ៉ាងអធិកអធម ព្រះអង្គម្ចាស់ ម៉ូហាម៉េដ បេន ហ្សាយេដ នៃប្រទេស​អេមីរ៉ាត អារ៉ាប់រួម ក្នុងខណៈពេល​បារាំង ក៏ដូចជា​ប្រទេស​អឺរ៉ុប​ផ្សេងទៀត​កំពុង​ត្រូវការប្រភពថាមពល​ថ្មី សម្រាប់​ជំនួស​ថាមពល​រុស្ស៊ី ដែល​ប្រទេស​លោក​ខាងលិច​ដាក់ទណ្ឌកម្ម​សេដ្ឋកិច្ច ដោយសារ​សង្រ្គាមឈ្លានពាន​អ៊ុយក្រែន។ តើ​អេមីរ៉ាតអារ៉ាប់រួម​នឹង​បង្កើនការផលិតប្រេង ដើម្បី ជួយជំរុញ ធ្វើ​ឲ្យតម្លៃប្រេង​នៅទីផ្សារ​ធ្លាក់ចុះ​ថោកដែរឬទេ?