នៅប្រទេសបារាំង ថ្ងៃព្រហស្បតិ៍​ទី​១៩មករា មានចលនាបាតុកម្មដ៏ធំនៅទូទាំងប្រទេសតែម្តង។ សហជីពព្រមទាំងប្រជាពលរដ្ឋបារាំង ប្រកាសចុះផ្លូវតវ៉ា ប្រឆាំងនឹងគម្រោងរបស់រដ្ឋាភិបាល​បារាំង ដែល​ចង់ធ្វើកំណែទម្រង់ប្រព័ន្ធចូលនិវត្តន៍ តាមរយៈការដំឡើងអាយុចូលនិវត្តន៍ ពី៦២ឆ្នាំ ដល់៦៤ឆ្នាំ។ ក្រៅពីបាតុកម្ម​នៅតាម​ដងផ្លូវ បុគ្គលិកនៅក្នុងវិស័យសំខាន់ៗជាច្រើន ដូចជា​វិស័យដឹកជញ្ជូន វិស័យអបរំ និង​វិស័យថាមពលជាដើម បានប្រកាសចូលរួម​បាតុកម្ម ធ្វើ​ឲ្យ​ដំណើរការ​សេវាកម្ម​ការងារ​​ទាំងអស់ ត្រូវបិទខ្ទប់ រាំងស្ទះនៅ​ទូទាំងប្រទេសតែម្តង​។