នៅ​ក្នុង​ប្រទេស​បារាំង ក្រុម​គ្រូបង្រៀន​នៅ​ទូទាំង​ប្រទេស​ចូលរួម​ធ្វើ​កូដកម្ម​នា​ថ្ងៃ​ព្រហស្បតិ៍ ទី១៣ មករា។ កូដកម្ម​ក្រោម​ទ្រង់ទ្រាយ​ធំ​នេះ​រៀបចំ​ឡើង​តាម​ការ​អំពាវនាវ​របស់​ក្រុមសហជីព​គ្រូបង្រៀន​សឹង​ទាំង​អស់ រួម​ទាំង​ក្រុម​អង្គការ​តំណាង​ឲ្យ​អាណាព្យាបាល​សិស្ស។ ២ឆ្នាំ​ក្រោយ​ការ​ផ្ទុះ​ជំងឺ​កូវីដ១៩ នេះ​ជា​លើកទី១ ដែល​មាន​កូដកម្ម​ក្រោម​ទ្រង់ទ្រាយ​ធំ​របស់​គ្រូបង្រៀន។ មួយ​វិញ​ទៀត កូដកម្ម​របស់​គ្រូបង្រៀន​ពេល​នេះ​ធ្វើ​ឡើង ៣ ខែ​មុន​ការ​រៀបចំ​បោះឆ្នោត​ជ្រើសរើស​ប្រធានាធិបតី​ថ្មី។