នៅ​ថ្ងៃ​អាទិត្យ ទី២២ មករា​នេះ ប្រទេស​បារាំង និង​ប្រទេស​អាល្លឺម៉ង់​ប្រារព្ធ​ខួប ៦០ឆ្នាំ​នៃ​សន្ធិសញ្ញា​មិត្តភាព។ សន្ធិសញ្ញា​មួយ​នេះ​ត្រូវ​បាន​ចុះ​ហត្ថលេខា​កាល​ពី​ថ្ងៃទី២២ មករា ឆ្នាំ ១៩៦៣ ក្នុង​ជំនាន់​ប្រធានាធិបតី​បារាំង​លោក​ឆាល៍ ដឺហ្គោល និង​នាយករដ្ឋមន្រ្តី​អាល្លឺម៉ង់​លោក​កុនរ៉ាដ អាដឺណាអូអេ។ ពិធី​ប្រារព្ធ​ខួប ៦០ឆ្នាំ​នៃ​សន្ធិសញ្ញា​មិត្តភាព​បារាំង អាល្លឺម៉ង់​ធ្វើ​ឡើង ខណៈ​ដែល​ទ្វីប​អឺរ៉ុប​កំពុង​ប្រឈម​នឹង​សង្រ្គាម​រុស្ស៊ី​ឈ្លានពាន​អ៊ុយក្រែន។ សង្រ្គាម​មួយ​នេះ​ហាក់​កំពុង​បង្ក​ឲ្យ​មាន​ភាព​ខុស​គ្នា និង​ការ​យល់​ខុស​គ្នា​រវាង​ក្រុង​ប៉ារីស និង​ក្រុង​ប៊ែរឡាំង។