ជាប់ឈ្មោះ​​ថា​ជា​មេដឹកនាំ​ផ្តាច់ការ មិនគួររាប់​​អាន ព្រោះ​មាន​ពាក់ព័ន្ធ​នឹង​ឃាតកម្ម​សម្លាប់​អ្នក​កាសែត​ ចាម៉ាល់ កាស៊ូហ្ស៊ី កាលពីជិត​បួនឆ្នាំ​មុន រាជបុត្រ​ស្នងរាជ​អារ៉ាប៊ីសាអូឌីត ម៉ូហាមេដ បេន សាលម៉ាន ឬ​ហៅ​កាត់​ថា MBS បាន​មក​បំពេញ​ទស្សនកិច្ច​នៅ​អឺរ៉ុប ​ជាលើក​ទីមួយ គិត​ចាប់​តាំងពី​ឆ្នាំ​២០១៨មក។ បន្ទាប់​ពី​ប្រទេស​ក្រិក រាជទាយាទអារ៉ាប៊ីសាអូឌីត​ បាន​មក​ដល់​ក្រុង​ប៉ារីស នៅថ្ងៃព្រហស្បតិ៍​ទី ២៨កក្កដា និង​ត្រូវ​បាន​ប្រធានាធិបតី​បារាំង លោក អេម៉ាណុយអែល​ ម៉ាក្រុង រៀប​ចំអាហារ​ពេល​ល្ងាច​ទទួល ​នៅ​វិមាន​អេលីហ្សេទៀត។ ប៉ុន្តែ​​ ​ការ​ស្វាគមន៍នេះ បាន​រង​​ការ​​រិះគន់​ស្ទើរ​ពីគ្រប់​មជ្ឈដ្ឋាន ពិសេស​ពីក្រុម​អ្នកការពារ​សិទ្ធិមនុស្ស។