PAULINES

Mabuting Balita | Enero 2, 2023 – Lunes | Kasunod ng Pagpapakita ng Panginoon

#MabutingBalita #DaughtersOfStPaulPhilippines #PaulinesPH

EBANGHELYO: Juan 1:19-28

Ito ang pagpapatotoo ni Juan, nang suguin sa kanya ng mga Judio mula sa Jerusalem ang ilang mga pari at mga Levita para tanungin siya: “Sino ka ba?” Sinabi niya ang katotohanan at di ipinagkaila; kanya ngang sinabi: “Hindi ako ang Kristo.” “Ano ka kung gayon? Si Elias ka ba?” “Hindi.” Ang propeta ka ba?” “Hindi!” “Sino ka ba? Para may maisagot kami sa mga nagsugo sa amin. Ano ba ang masasabi mo tungkol sa iyong sarili?” “Ako ang ‘tinig ng sumisigaw sa ilang, “tuwirin ninyo ang daan ng Panginoon.’’’ “At bakit ka nagbibinyag kung hindi ikaw ang Kristo, ni si Elias, ni ang Propeta?” “Sa tubig lang ako nagbibinyag, ngunit kasama naman ninyo siyang nakatayo na hindi pa ninyo nakikilala. Dumating siyang kasunod ko ngunit hindi ako karapat-dapat na magkalag ng panali ng kanyang panyapak.” Sa Betaraba nangyari ang mga ito, sa kabilang ibayo ng Jordan na pinagbibinyagan ni Juan.

PAGNINILAY:

Malinaw kay Juan Bautista and kanyang identity. Inamin niya: “Ako ang tinig na humihiyaw sa ilang: Tuwirin ninyo ang daan ng Panginoon.” Bilang paghahanda ng daan ng Panginoon, nangaral siya ng binyag ng pagsisisi sa ikapagpapatawad ng kasalanan. Hindi siya natakot na tawagin ang mga nang-aabuso sa mga mahihirap at ang mga namumuhay nang saliwat sa utos ng Diyos, kasama na rito si haring Herodes. Ito ang nagdala sa kanya sa kamatayan. Ngunit no regrets siya. Natapos niya ang kanyang misyon.

Kumbinsido si Juan Bautista sa kanyang identity at misyon, at isinabuhay niya ito nang buong katatagan at katapatan. Kapatid, napakahalagang bagay na linawin natin sa ating sarili ang ating identity dahil ito ang nagbibigay kahulugan sa ating buhay. Halimbawa, kung may magtanong sa atin, “Sino ka ba?” masasagot kaya natin nang may buong conviction: “Ako ay anak ng Diyos, at narito ako sa mundo upang magpahayag ng Kanyang kaharian.” Hindi ba, bilang mga binyagan, ito ang ating tunay na identity? Kung tayo ay kumbinsido nito, hindi tayo madaling ma-confuse sa ating mga decisions. Magiging matatag tayong manindigan sa katotohanan at katarungan. Higit sa lahat, maramdaman natin ang ligayang dulot ng Espiritu Santo at magiging mapagkalinga tayo sa ating kapwa tao. Ama, paningasin mo po sa amin ang kaloob mong panampalataya na kami’y mga minamahal mong anak. Amen.

- Sr. Vangie Canag, fsp | Daughters of St. Paul

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Mabuting Balita | Enero 1, 2023 – Linggo | Bagong Taon - Dakilang Kapistahan ni Maria, Ina ng Diyos

#MabutingBalita #DaughtersOfStPaulPhilippines #PaulinesPH

EBANGHELYO: Lucas 2:16-21

Nagmamadaling pumunta ang mga pastol sa Bethlehem at natagpuan nila si Maria at si Jose at ang sanggol na nakahiga sa sabsaban. Pagkakita rito, pinatotohanan nila ang pahayag na binigkas sa kanila tungkol sa batang ito. Namangha rin ang mga nakarinig sa mga sinasabi ng pastol sa kanila. Iningatan naman ni Maria ang mga ito at pinagnilay-nilay sa kanyang puso. Umuwi ang mga pastol na niluluwalhati at pinupuri ang Diyos dahil nakita nila ang lahat ng kanilang narinig ayon sa ipinasabi sa kanila. Pagsapit ng ikawalong araw, kailangan nang tuliin ang bata; noon siya pinangalanang Jesus, ang itinawag sa kanya ng anghel bago pa siya ipinaglihi.

PAGNINILAY:

Naghahatid ng bagong sigla at init sa ating kalooban ang awit ng ating Mahal na Ina, Birhen Maria -- Siyang bukod na pinagpala sa babaeng lahat. “Dinadakila ng aking kaluluwa ang Panginoon at nagagalak ang aking espiritu sa Diyos na aking tagapagligtas.” (Lk 1, 46-47) Awit ng pusong puno ng pasasalamat sa mga kagila-gilalas na ginawa ng Panginoon sa kaniyang buhay.

Minsan, may napanood akong interview sa isang bata pang negosyante na naging milyonaryo. Nag share siya kung paano niya binuo ang kanyang negosyo at kung paano ito naging successful. Bago natapos ang panayam sa young businessman na ito, meron siyang tinawag na isang staff, isang PWDna naging trusted niya sa pagpapatakbo ng nasabing negosyo. Nag share din ito ng kaniyang sobra-sobrang pasasalamat. Ikinuwento niya na, sa mahabang panahon walang tumatanggap sa kaniya sa trabaho dahil sa kaniyang kalagayan. Pero, ngayon pinagkakatiwalaan siya at nagkaroon ng opportunity na baguhin ang takbo ng kanyang buhay at ng kaniyang pamilya.

Mga kapanalig, marahil ang ating mga kahinaan ang nagiging hadlang sa atin upang magampanan ng lubusan ang ating mga tungkulin. Inaanyayahan tayo ng Mabuting Balita, na makinig at pagnilayan ang kamay ng Diyos na kumikilos sa ating mga karanasan. Maging sensitibo nawa tayo nang makita natin at mapansin ang tahimik na pagdating ng Diyos sa ating buhay araw-araw.

Ang kasalanan at hilig sa makamundong kaisipan ang nagiging hadlang upang maging lubusang ganap ang pakikiniig at pagtubos ng Diyos sa atin. Hangad Niyang makita natin at mapatunayan na higit pa ang Kaniyang biyaya kaysa sa ating sala.

Ipagdasal natin na sa tulong ng Mahal na Ina, matularan natin ang dalisay Niyang puso at kahandaan sa pagtupad sa kalooban ng Diyos. Kasama ang ating Mahal na Ina, Birhen Maria, sama-sama tayong bumangon at ipahayag ang pagpapala ng ating Panginoon. With Mary, we rise in haste to serve our brothers and sisters!

- Sr. Amelyne Paglinawan, fsp | Daughters of St. Paul

You are listening to the daily gospel reflections with Sr. Cloth, fsp

This podcast is brought to you by the Paulines Multimedia. It is our mission to Bring the WORD of GOD to all peoples, through sounds and images, voices and music. Come and join us as we share “A THOUGHT A DAY”.

Praying for a Peaceful New Year 2023 | Word and Songs with Sr. Lines Salazar, fsp

The Solemnity of Mary Mother of God falls exactly one week after Christmas, the end of the octave of Christmas. It is fitting to honor Mary as the Mother of Jesus, following the birth of Christ. When Catholics celebrate the Solemnity of Mary Mother of God, we are not only honoring Mary, who was chosen among all women throughout history to bear God incarnate, but we are also honoring our Lord Jesus, who is fully God and fully human. Calling Mary "mother of God" is the highest honor we can give Mary. Just as Christmas honors Jesus as the "Prince of Peace," the Solemnity of Mary Mother of God honors Mary as the "Queen of Peace."  The Mother of the Prince of Peace desires to serve and to intercede so that the peace of her Son will reign in our lives and in our world.

Peace is not merely the absence of war. It is the fruit of justice and love. We are all responsible for promoting peace: in our families and communities and in the world. Peace must first be deeply rooted in each of our hearts and then it spreads to our families and others. An authentic culture of peace can only grow in the world when there is respect for justice and when there is love in people’s hearts.  Let us invoke the assistance of the Blessed Mother to lead and guide us as we face another year of our life... and lead us closer to her Son Jesus.

Mabuting Balita Disyembre 30, 2022 – Biyernes

Ikaanim na araw ng Pagdiriwang ng Pasko ng Pagsilang

Ebanghelyo: Mateo 2: 13-15, 19-23

Pagkaalis ng mga pantas, nagpakita kay Jose ang Angel ng Panginoon sa panaginip at sinabi: “Bumangon ka, dalhin ang sanggol at ang kanyang ina at tumakas pa-Ehipto. Manatili ka roon hanggang sa tawagin ko kayo. Hahanapin nga ni Herodes ang sanggol para patayin.” Bumangon naman si Jose, at nang gabi ring iyo'y dinala ang sanggol at ang ina nito pa-Ehipto. Doon sila nanirahan hanggang mamatay si Herodes. Sa ganito natupad ang sinabi ng Panginoon sa pamamagitan ng Propeta: “Tinawag ko ang aking anak mula sa Ehipto.”  Pagkamatay ni Herodes, nagpakita sa panaginip ang anghel ng Panginoon kay Jose at sinabi. “Bumangon ka at dalhin ang bata at ang kanyang ina at umuwi sa lupain ng Israel. Sapagkat patay na ang mga nagtangkang pumatay sa bata. Kaya bumangon si Jose. Kinuha ang bata at ang ina nito at pumunta sa Luapin ng Israel. Ngunit nang malaman ni Jose na si Arquelao ang hari ng Judea na kahalili ng kanyang amang na si Herodes, natakot siyang pumaroon. Kaya ayon sa ibinilin sa kanya sa panaginip, sa Galilea siya nag punta, nanirahan sila sa bayang tinatawag na Nazaret. Kaya natupad ang salita ng mga propeta. “Tatawaging siyang Nazoreo.”

Pagninilay:

Anong mga katangian ng banal na Mag-anak ang nais mo ring umiral sa inyong Pamilya? Nakakapagbigay ng ginhawang pagnilayan na si Maria at Jose ay nagturo sa kanilang anak na manalangin! Isa itong paglalakbay bilang isang pamilya. Nakakagaan din sa puso na sa buong maghapon sama-sama rin silang nagdadasal. Buong pamilya din silang magkakasamang pumunta sa Templo para makinig sa mga pagbasa mula sa mga Batas at mga Propeta at magkakasamang nagpasalamat sa Diyos sa kanilang pagsamba.  Napakahalaga sa isang pamilya ang sama-samang paglalakbay tungo sa iisang adhikain o common goal!  Sa ating sama-samang paglalakbay bilang isang pamilya, nararanasan natin ang mga hirap pero sama -sama rin nating natatamasa ang tuwa at kaginhawaan. At alam natin meron tayong daan na kinakailanagan tahakin nang sama-sama. Hindi ba’t wala ng hihigit sa tuwa nating maranasan na sa ating pagdadasal sa umaga at sa gabi ang mga magulang ay magbibigay ng tanda o blessing sa mga bata. Isang simpleng paraan nang pagbibigay ng blessing. Ipinagkakatiwala natin sila sa pag-iigat at pag gabay ng Diyos. Sa ating pagdadasal sa harap ng hapag . Nagpapasalamat sa biyayang natanggap para sa pamilya at pag-alala sa mga kapwang nangangailangan din ng biyaya.  Sa bawat paglalakbay, hindi lang ito natatapos kapag narating na natin ang ating destinasyon kundi sa ating pagbabalik tanaw. Iniisip natin ang mga aral na ating natutunan sa karanasang ito. Marahil sa pagpapatawad sa isa’t-isa, na nagbibigay sa atin ng pagkakataong lumago sa ating pagkatao at isang pamilya. Nagkakaroon tayo ng mas malalim at makahulugan na paglalakbay dahil sa pagbibigayan ng pangunawa, pagpapatawad at suporta kung anuman ang pagkukulang at pagkakamali. Makabuluhan ang paalala ng ating Santo Papa, Pope Francis sa kanyang mensahe sa mga Pamilya nung “Year of Mercy” na “Huwag sana tayong mawalan ng tiwala sa ating pamilya. Napakaganda kung lagi tayong maging bukas sa isa’t-isa. Kung merong pagmamahal, merong pag-unawa merong pagpapatawad." Nawa’y maging lakas natin ang halimbawa ng Holy Family, nina Jesus, Maria at Jose. Happy Feast of the Holy Family. God Bless You, A Blessed Christmas and A Blissful year 2023! AMEN

SR. CLEMENCE  MALLETE, Fsp l Daughters of Saint Paul

Mabuting Balita l Disyembre 31, 2022 – Sabado

Ikapitong araw ng Pagdiriwang ng Pasko ng Pagsilang

Ebanghelyo: Juan 1:1-18

Sa simula’y may Wikang-Salita na nga, at kaharap ng Diyos ang Salita, at Diyos ang Salita. Kaharap na nga siya ng Diyos sa simula. Sa pamamagitan niya niyari tanang mga bagay, at kung wala siya, walang anumang nayari. Ang nayari ay buhay sa kanya, at liwanag ng mga tao ang buhay. Sa karimlan sumisikat ang liwanag at hindi ito nahadlangan ng karimlan. May taong sinugo ang Diyos—Juan ang kanyang pangalan. Dumating siya para magpatotoo, para magpatotoo tungkol sa liwanag, upang maniwala ang lahat sa pamamagitan niya. Hindi ‘yon liwanag, kundi patotoo tungkol sa Liwanag. Pagkat paparating noon sa mundo ang Liwanag na totoo na siyang tumatanglaw sa bawat tao. Bagamat nasa mundo siya at sa pamamagitan n’ya nagawa ang mundo. Hindi s’ya kilala ng mundo. Sa sariling kanya s’ya pumarito at hindi siya tinanggap ng mga kanya. Ngunit sinumang tumanggap sa kanya sa paniniwala sa kanyang Pangalan, binigyang kakayahan nga sila na maging mga anak ng Diyos. Hindi mula sa dugo ang kanilang pagsilang, ni mula sa kagustuhan ng laman ni sa kagustuhan ng lalaki kundi mula sa Diyos. At naging laman ang Wikang-Salita at itinayo ang kanyang tolda sa atin, at nakita niya ang kanyang kaluwalhatian, ang kaluwalhatiang mula sa Ama na bagay para sa bugtong na Anak, kaya lipos sa ng kagandahang-loob at katotohanan. Nagpatotoo sa kanya si Juan at isinisigaw: “Siya ang aking tinukoy: nagpauna na sa akin ang dumating na kasunod ko, sapagkat bago ako’y siya na.” Mula sa kanyang kapuspusan nga tumanggap tayong lahat, oo, abut-abot na kagandahang loob. Sa pamamagitan ni Moises ibinigay ang Batas, sa pamamagitan ni Hesukristo naman dumating ang kagandahang-loob at ang katotohanan. Kailanma’y walang sinumang nakakita sa Diyos; ang Bugtong na Anak lamang ang nagpahayag sa kanya, siya ang nasa kandungan ng Ama.

Pagninilay:

Maligayang Pasko pa rin sa inyong lahat! Ngayon ay huling araw ng taong 2022. Bukas ay bagong taon na. Marahil marami sa atin ang nananabik sa mga mangyayari sa taong 2023. Pero siguro marami din sa atin ang nangangamba, natatakot, at nababahala sa mga pagsubok na maaari nating kahaharapin sa bagong taong ito. Sinasabi ni Juan sa ating ebanghelyo: “Nagkatawang-tao ang Salita at nanahang kasama natin.” Bagama’t merong takot at pangamba sa ating mga puso, ang pagkakatawang-tao ng ating Panginoon ay may dalang pangako: “Kasama mo ako.” Kasama mo akong maglalakad kahit sa kadiliman ng iyong buhay. Kasama mo ako sa panahong ika’y natatakot. Kasama mo ako sa pagpasan ng iyong mga krus. Kasama mo ako kapag broken-hearted ka. Kasama mo ako sa iyong kasiyahan, lalo’t higit sa iyong kalungkutan. Kasama mo ako sa bawat daang tatatahakin mo.  Nawa ang pangakong ito ay magbigay ng lakas na loob sa atin sa pagpasok natin sa bagong taon.

FR. ANTHONY CAPIRAYAN, SSP

Mabuting Balita l Disyembre 29, 2022 – Huwebes

Ikalima na araw ng Pagdiriwang ng Pasko ng Pagsilang

Ebanghelyo: Luke 2:22-40 -35

Nang dumating na ang araw ng paglilinis nila ayon sa Batas ni Moises, dinala ang sanggol sa Jerusalem upang iharap sa Panginoon--tulad ng nasusulat sa Batas ng Panginoon: Lahat ng panganay na lalaki ay ituturing na banal para sa Panginoon. Dapat din silang mag-alay ng sakripisyo tulad ng binabanggit sa Batas ng Panginoon: isang pares na batubato o dalawang inakay na kalapati. Ngayon sa Jerusalem ay may isang taong nagngangalang Simeon; totoong matuwid at maka-Diyos ang taong iyon. Hinihintay n’ya ang pagpapaginhawa ng Panginoon sa Israel at sumasakanya ang Espiritu Santo. Ipinaalam naman sa kanya ng Espiritu Santo na hindi s’ya mamamatay hangga’t hindi n’ya nakikita ang Mesiyas ng Panginoon. Kaya pumunta siya ngayon sa Templo sa pagtutulak ng Espiritu, nang dalhin ng mga magulang ang batang si Hesus para tuparin ang kaugaliang naaayon sa Batas tungkol sa kanya. Kinalong siya ni Simeon sa kanyang braso at pinuri ang Diyos, at sinabi: “Mapayayaon mo na ang iyong utusan, Panginoon, nang may kapayapaan ayon na rin sa iyong wika; pagkat nakita na ng aking mga mata ang iyong pagliligtas na inihanda mo sa paningin ng lahat ng bansa, ang liwanag na ibubunyag mo sa mga bansang pagano at ang luwalhati ng iyong bayang Israel.” May isa ring babaeng propeta, si Ana na anak ni Panuel na mula sa tribu ng Aser. Matandang-matanda na siya. Pagkaalis ng bahay sa kanyang ama, pitong taon lamang silang nagsama ng kanyang asawa, at nagbuhay biyuda na siya at hindi na siya umaalis sa Templo. Araw-gabi siyang sumasamba sa Diyos sa pag-aayuno at pananalangin. Walumpu’t-apat na taon na siya. Sa pag-akyat niya sa sandaling iyon, nagpuri rin siya sa Diyos at nagpahayag tungkol sa bata sa lahat ng naghihintay sa katubusan ng Jerusalem. Nang matupad na ang lahat ng ayon sa Batas ng Panginoon, umuwi sila sa kanilang bayan, sa Nazaret sa Galilea. Lumaki at lumakas ang bata; napuspus siya ng karunungan at sumasakanya ang kagandahang-loob ng Diyos

Pagninilay:

Taong 2021, nagsurvey ang Global Attitude Surveys na may katanungang: What makes life more meaningful? Young adults: Family, Friends, Career. Middle aged: Family, Career, Material security. Old aged: Family, Material Security, Health. Kung susumahin, mahalaga po sa lahat ng antas ng edad ang pamilya, relasyon. Sa Mabuting Balita ngayong ika-limang araw matapos ang pasko, tampok si Simeon. Sinabi sa atin na siya’y matanda na at naghihintay na ng kanyang pagyao. Ngunit, buong buhay tinatanong ni Simeon ang sarili—what makes my life meaningful? Hanggang isang araw, sa paggabay ng Espiritu ng Diyos, pumunta siya sa templo at doon natagpuan ang tunay na saysay at kahulugan ng kanyang pag-iral—si Hesus! Ang pinananabikang Mesiyas at manunubos ng lahat. Sana matularan natin ang buhay ni Simeon. Hinayaan niyang gabayan siya lagi ng Espiritu ng Diyos upang maganap ang kalooban ng Diyos sa kanyang buhay. Kaya naman, nakita niya ang Mesiyas ng Diyos—dahil dito’y naging ganap ang kanyang kagalakan at buhay. Who gives meaning and hope to our lives? Jesus—the new-born child in our hearts! – Cl. Vinz Aurellano, SSP | Society of St. Paul

Mabuting Balita l Disyembre 28, 2022 – Miyerkules

Ikaapat araw ng Pagdiriwang ng Pasko ng Pagsilang

Ebanghelyo: Mateo 2: 13-18

Pagkaalis ng mga pantas, nagpakita kay Jose ang Angel ng Panginoon sa panaginip at sinabi: “Bumangon ka, dalhin mo ang sanggol at ang kanyang ina at tumakas pa-Ehipto. Manatili ka roon hanggang sa tawagin ko kayo. Hahanapin nga ni Herodes ang sanggol para patayin.” Bumangon si Jose, at nang gabi ring iyo'y dinala ang sanggol at ang ina nito pa-Ehipto. Doon sila nanirahan hanggang mamatay si Herodes. Sa ganito natupad ang sinabi ng Panginoon sa pamamagitan ng mga Propeta: “Tinawag ko ang aking anak mula sa Ehipto.” Nagalit naman si Herodes nang malaman nito na napaglalangan siya ng mga pantas. Kaya inutos niyang patayin ang lahat ng batang lalaki sa Betlehem at mga karatig nito, mga batang may dalawang taong gulang pababa, batay sa panahon ng pagsikat ng tala ayon sa mga pantas. Kaya nagkatotoo ang sinabi ni Propeta Jeremias: “Narinig sa Rama ang pagtangis, iyakan at malakas na panaghuyan: iniiyakan ni Raquel ang kanyang mga anak at ayaw paaliw pagkat wala na sila.”

Pagninilay:

Pro-life ka ba? Handa ka bang ipagtanggol ang buhay? Ang massacre ng mga sanggol sa Belen na napakinggan natin sa ebanghelyo, ay hindi pa tapos. Nagpapatuloy pa ito ngayon sa pamamagitan ng abortion at infanticide. Maliit lang ang area ng Betlehem, kaya malamang na ang mga sanggol na pinatay ay few thousands lang. Ngayon ang mga biktima ng abortion sa buong mundo ay millions. Sa Betlehem ang nagpapatay sa mga sanggol ay si Herodes, ang haring sakim. Ngayon, ang nagpapatay sa mga sanggol ay ang kanilang mismong ina! Sila yong mga subscriber ng Pro-Choice Movement na nagsasabing ang babae ay may karapatang magdesisyon tungkol sa buhay ng nilalang sa kanyang sinapupunan.

Ang ating buhay ay galing sa Diyos at Siya lang ang may karapatan dito. Ibinahagi Niya sa atin dahil sa Kanyang pagmamahal. Nais Niyang mamuhay tayo ng ganap at masaya: dito sa lupa at sa walang - hanggan sa langit. Bilang pasalamat dapat nating pangalagaan ang buhay na dulot ng Diyos, ‘di ba? Kalingain ang sarili, ang kapwa-tao, ang kalikasan, at higit sa lahat, ang buhay espiritwal.

Bilang mga Kristiyano, tinatawagan rin tayong manindigan laban sa kultura ng kamatayan. Paano natin ito maisabuhay? Gamitin natin ang social media upang maisiwalat ang ebanghelyo, ang katotohanang makapagligtas.

– Sr. Evangelina Canag, fsp | Daughters of St. Paul

Panalangin:

Panginoon, bigyan Ninyo kami ng lakas espiritwal upang maging matibay kaming haharap sa pwersa ng kadiliman. Amen.

Mabuting Balita l Disyembre 27, 2022 – Martes

Ikatlong araw ng Pagdiriwang ng Pasko ng Pagsilang

Ebanghelyo: Juan 20:2-8

Patakbong pumunta kay Simon Pedro at sa isa pang alagad na mahal ni Hesus si Maria Magdalena. Sinabi n’ya sa kanila, “May kumuha sa Panginoon mula sa libingan, at hindi namin alam kung saan nila siya inilagay.” Kaya lumabas si Pedro at ang isa pang alagad, at pumunta sa libingan. Sabay na tumakbo ang dalawa. Ngunit mas mabilis tumakbo ang isa pang alagad kaysa kay Pedro, at unang nakarating sa libingan. Pagkayukod niya'y nakita niyang naroroon ang mga telang lino. Ngunit hindi siya pumasok. Dumating si Simon Pedro, na kasunod niya, at pumasok siya sa libingan. Nakita niya na nakalatag ang mga telang lino, at ang panyo namang nakatalukbong sa ulunan niya ay di nakalatag gaya ng mga telang lino kundi nakalulon sa mismong lugar nito. Pumasok noon ang isa pang alagad, ang unang nakarating sa libingan, at nakita niya at naniwala siya.

Pagninilay:

Kapistahan ngayon ni San Juan ang Ebangelista, ang tinatanging disipulo o ang alagad na pinakamamahal ng ating Panginoon. Sa Mabuting Balitang siya rin ang may akda, pinakikilala kung papaano kahit ngayon panahon ng kapaskuhan, ang eksena ng muling pagkabuhay. Naroon ang San Pedro kasa-kasama na alagad na pinakamamamahal ng Panginoon, nagmamadaling pumunta doon sa pinaglibingan ng ating Panginoon. Na makita nila na wala doon ang bangkay ng ating Panginoon, ang sambit sa huling bahagi ng mabuting balita ang minamahal na alagad ay pumasok din sa libingan, nakita niya at naniwala siya.

Sa pagtitiwala, pananampalataya, at pananalig ni San Juan naroon din ang kakambal ng kanyang napakalalim na pagmamahal sa ating Panginoon. Hilingin natin ang dalawang biyayang ito na pareho nating pagtambalin sa ating pag araw-araw na buhay: Ang malalim na pananalig at masidhing pagmamahal sa ating Panginoon. Isabuhay nawa natin ito sa pamamagitan ng pagmamahal at pagmamalasakit sa ating kapwa.

- Fr. Eugene Dominic Hechanova | Archdiocese of Lipa