PAULINES

MABUTING BALITA l SETYEMBRE 25, 2022 – LINGGO

Ika – 26 na LINGGO sa Karaniwang Panahon

Ebanghelyo: Lc 16:19-31

Sinabi ni Hesus sa mga Pariseo: “May isang mayaman na nakabihis ng magarang damit at pinong linen at parang piesta ang kanyang buhay araw-araw. Nakahandusay naman sa may pintuan n’ya ang isang dukhang nagngangalang Lazaro. Tadtad s’ya ng sugat at gusto sana n’yang kanin ang mumong nahuhulog sa hapag ng mayaman; sa halip ay mga aso ang lumalapit sa kanya at hinihimuran ang kanyang sugat. At namatay ang dukha at dinala s’ya ng mga anghel sa piling ni Abraham. Namatay din ang mayaman at inilibing. Nang nasa impiyerno na s’ya tumingala s’ya sa kanyang pagdurusa at natanaw sa malayo si Abraham at si Lazaro sa piling nito. Kaya’t sumigaw siya: 'Amang Abraham, maawa ka sa akin at utusan mo naman si Lazaro na isawsaw n’ya sa tubig ang dulo ng kanyang daliri at paginhawahin ang aking dila dahil lubha akong naghihirap sa lagablab na ito.' 'Anak, alalahanin mong tinanggap mo na sa buhay mo ang mabuti sa iyo at kay Lazaro naman ang masasama. Kaya s’ya ngayon ang nasa ginhawa at ikaw ang nagdurusa. At isa pa'y malawak na bangin ang hindi matatawid ang itinakda sa pagitan natin. Kaya hindi makatatawid ang mga may gustong pumunta riyan galing dito at hindi rin naman makatatawid ang mula riyan papunta rito.' 'Kaya ipinakikiusap ko sa iyo, Ama, na papuntahin mo si Lazaro sa bahay ng aking ama, kung saan naroon ang lima kong kapatid para babalaan sila upang di sila mapunta sa lugar na ito ng pagdurusa.' 'Nasa kanila si Moises at ang Mga Propeta, makinig sila sa mga ito.' 'Hindi gayon, Amang Abraham; kung isa sa mga patay ang pupunta sa kanila, magsisisi sila.' 'Kung hindi nila pakikinggan si Moises at ang Mga Propeta, hindi pa rin sila maniniwala bumangon man ang isa sa mga patay.'”

Pagninilay:

Dalawang tagpo ang ipinakita sa atin sa ebanghelyo. Una, ang maranyang pamumuhay ng isang mayaman na may magarang kasuotan, masarap na mga pagkain at inumin, at malaking bahay. Sa harap ng bahay naroon si Lazaro, isang pulubi na nag-aabang ng mumo mula sa mesa ng mayaman. May mga sugat si Lazaro at dinidilaan iyon ng isang aso na nakakapagbigay sa kanya ng kaunting ginhawa. Ang ikalawang tagpo ay sa kabilang buhay kung saan tinatamasa ni Lazaro ang buhay sa piling ni Abraham at ng mga banal. Mula sa lugar na iyon, nasilip ng mayamang lalaki ang magandang kinahinatnan ni Lazaro habang siya ay nagtitiis ng init ng apoy sa Hades. Nakiusap ang mayaman na utusan si Lazaro na isawsaw sa tubig ang dulo ng kanyang daliri at palamigin ang kanyang dila. Nang namuhay nang marangya ang mayamang lalaki, hindi niya kilala si Lazaro kahit naroon ito sa daanan ng kanyang bahay. Malaki ang nagging pagitan nila sa isa’t isa, at ang pagitang iyon ang dala nila sa kabilang buhay. Hindi naman masamang tao ang mayamang lalaki. Hindi niya itinaboy si Lazaro, hindi niya nilait. Ngunit nagkamali siya dahil wala siya ano mang ginawa para kay Lazaro at tumutok lamang siya sa kanyang sarili. Marahil, sa kabilang buhay, hindi lamang babalikan ang mga masasamang bagay na hindi natin dapat ginawa, ngunit titingnan din ang mga mabubuting bagay na maari sana nating ginawa para sa ating kapwa ngunit nabigo tayong gawin.

-FR. PAUL MARQUEZ, SSP

This podcast is brought to you by the Paulines Multimedia. It is our mission to Bring the WORD of GOD to all peoples through sounds and images, voices and music. Come and join us as we share “A THOUGHT A DAY”

Word and Songs | Listening to God in Prayer with Sr Lines Salazar, fsp

Scriptwriter: Sr. Divinia de Claro, fsp

MABUTING BALITA l SETYEMBRE 24, 2022 – SABADO

Ika – 25 na LINGGO sa Karaniwang Panahon

Ebanghelyo: Lc 9:43b-45

Nang lubos na nagtataka ang lahat dahil sa mga ginagawa ni Hesus, sinabi ni Hesus sa kanyang mga alagad: “Itanim ninyong mabuti sa inyong pandinig ang mga kataga kong ito: Ibibigay ang Anak ng Tao sa kamay ng mga tao.” Hindi nila naintindihan ang pahayag na ito at nalingid ito sa kanila upang hindi nila maunawaan. At takot naman silang magtanong sa kanya tungkol sa pahayag na ito.

Pagninilay:

Naranasan mo nabang ipagkanulo? Marahil isa ito sa pinakamasakit na karanasan lalo na kung mararanasan mo ito mula sa iyong pamilya o malapit na kaibigan. Sa ebanghelyo ngayon, natunghayan natin ang pangalawang beses na pagsasabi ni Hesus ng kanyang haharaping pagdurusa sa krus. Ginawa niya ito habang ang lahat ay nagdiriwang at nahihiwagaan pa sa mga himala na ginawa niya gaya ng pagpapagaling sa may sakit, sa gitna ng unti-unti pagiging tanyag ng kayang grupo. Sa paraang ito pinipilit na Hesus na ipaunawa sa mga alagad ang kahalagahan ng sakripisyong kanyang gagawin ngunit nananatili paring sarado ang kanilang isipan sa realidad ng Krus. Sa unti-unting pagpapaliwanag ni Hesus ng misteryo ng pagliligtas ninanais niya na mas mapalalim pa ang kaugnayan sa kanya ng mga alagad. Sa buhay nang tao, madalas nabubulag tayo ng pansamatalang saya o nabibingi sa realidad ng hirap ng buhay na kaakibat ng katanyagan at yaman. Hinahamon tayo ng ebanghelyo na maging bukas sa pagsasakripisyo at pag-aalay ng sarili para sa kaharian ng Diyos. Ang pagiging Kristiyano ay nangangahulugan ng araw-araw na pagpapasan ng Krus, ng pamilya, kaibigan, ng bayan, pangarap – dahil bawat krus ay may kalakip na tagumpay. Ang bawat paghihirap ay magiging makabuluhan kapag ito ay iniaalay para sa Diyos at Kapwa. Hinahamon tayo ni Hesus na sumunod sa kanya at makibahagi sa pagpasan ng krus na magliligtas sa bawat isang nananalig at sumasampalataya –may gantimpalang walang hanggang buhay para sa may bukas na puso. Halikana at sundan si Hesus, at maging tapat na alagad hanggang sa huli.

-BRO. MIKO DELA CRUZ, SSP

This podcast is brought to you by the Paulines Multimedia. It is our mission to Bring the WORD of GOD to all peoples through sounds and images, voices and music. Come and join us as we share “A THOUGHT A DAY”

MABUTING BALITA l SETYEMBRE 23, 2022 – BIYERNES

Ika – 25 na LINGGO sa Karaniwang Panahon

Ebanghelyo: Lc 9:18-22

Minsan, mag-isang nagdarasal si Hesus at naroon din ang mga alagad. Tinanong niya sila: “Sino raw ako ayon sa sabi ng mga tao?” “Si Juan Bautista raw. May iba namang nagsasabing ikaw si Elias. At may iba pang nagsasabi na isang propeta noong una ang nabuhay.” “Ano naman ang sinasabi ninyo kung sino ako?” Sumagot si Pedro: “Ang Mesiyas ng Diyos.” At inutusan sila ni Hesus na huwag sabihin ito kanino man. Sinabi nga ni Hesus: “Kailangang magtiis ng marami ang Anak ng Tao. Itatakwil nga siya ng mga Matatanda ng bayan, ng mga Punong-pari at ng mga guro ng Batas. Papatayin siya at muling babangon sa ikatlong araw.”

Pagninilay:

Naaalala ko may isa akong kaibigan na lumapit sa akin at nagmarites “Uy alam mo ba si ano, may bagong chika sa kanya.” Syempre ako naman nakimarites na rin at kung ano ano ang nasabi sa taong ito. Palibhasa kilala namin ang taong ito kaya may nasasabi siya sa kanya. Ngunit hindi natapos sa pakikimarites dahil sinabi ko rin na hindi rin naman perpekto ang tao at hindi dapat na pag usapan at ipagdasal ang kapatid na ito. Napapaisip nga ako, kung ang mga tao ay may nasasabi sa kapwa nila? Si Hesus kaya? Kaya rin bang ipahayag ng tao sa iba? Sino kaya si Hesus sa kanila? Sa ating ebanghelyo ipinahayag ni Pedro na si Hesus ay Mesiyas. Sa ating buhay, ipinahahayag din ba natin na si Hesus ang Mesiyas? Ano ang ginagawa natin sa ating kapwa bilang simbulo ng pagmamahal natin kay Hesus? Dahil ang ating ginagawa sa ating kapwa ay ginagawa na rin natin sa ating Panginoon. Nasa sa atin kung paano natin ipinapahayag si Hesus sa pagsasabuhay ng Kanyang mga salita.

- Tom Banton – Seminarian, Diocese of Antipolo

This podcast is brought to you by the Paulines Multimedia. It is our mission to Bring the WORD of GOD to all peoples through sounds and images, voices and music. Come and join us as we share “A THOUGHT A DAY”

MABUTING BALITA l SETYEMBRE 22, 2022 – HUWEBES

Ika – 25 na LINGGO sa Karaniwang Panahon

Ebanghelyo: Lc 9:7-9

Nabalitaan ng tetrarkang si Herodes ang lahat ng pangyayari at litung-lito siya dahil may nagsasabing nabuhay mula sa mga patay si Juan. Sinabi naman ng iba na nagpakita si Elias, at nang iba pa na isa sa Mga Propeta noon ang bumangon. At sinabi ni Herodes: “Pinapugutan ko si Juan; sino nga kaya itong nababalitaan kong gumagawa ng mga iyon?” Kaya sinikap niyang makita s’ya.

Pagninilay:

“Gusto mo bang makita si Hesus?” Kung tatanungin natin ang mga tao kung nais nilang makarating sa langit, o kaya makapiling ang Diyos o makasama si Hesus habangbuhay, sigurado akong Oo ang maririnig nating kasagutan. Madali naman kasing sabihin na gusto natin ang isang bagay. Sabi nga nila, libre naman ang mangarap. Kahit sino pwedeng ipahayag ang kanyang ninanais na pangarap sa buhay. Ngunit, ang mas mabigat na katanungan, “Ano ang ating ginagawa para maganap o matupad ang ating pinapangarap?” Kung nais nating maging isang ganap na propesyonal, paano tayo naghahanda? Kung nais nating maging mahusay na mananayaw o atleta, nag-eensayo ba tayo? Lahat ito may kaakibat na pagsisikap, sakripisyo at paglalaan ng sapat na panahon. Gayundin, kung nais nating makita at makasama si Hesus sa ating buhay, hinahanap ba natin siya? Sinisikap ba nating maging banal? Nakikinig ba tayo sa kanyang aral at isinasabuhay ito? Mga kapatid, madaling sabihin na gusto nating makasama si Hesus. Ang tanong, kaya ba nating tupdin ang kanyang mga ihinahaing alituntunin? Kaya ba nating buksan ang ating puso at isipan upang unawain na sa ating pananalig kay Hesus higit pa sa ating inaasahang kaharian ang tunay na paghaharing ibinibigay Niya sa atin? Kaya ba nating magsakripisyo at isabuhay ang hamon ng ating pananampalataya? Mga kapatid, narinig natin sa ebanghelyo ngayon na ninais din ni Haring Herodes na Makita si Hesus. Ngunit hindi handa si Herodes. Bagama’t nasa harapan na niya noong panahon ng paglilitis si Hesus, hindi pa rin nakita ni Herodes sa kanyang puso kung sino talaga si Hesus. Wala siyang buháy na pananampalataya. Kung nais talaga nating makapiling si Hesus sa ating buhay, alam natin ang kailangan. Walang paliguy-ligoy, Isang buháy na pananampalataya na handang magsakripisyo, handang maging bukas palad sa ating kapwa na nangangailangan, handang talikdan ang mga dating baluktot na gawain upang yakapin ang matuwid at bagong buhay na ibinibigay ng Diyos sa atin. Hindi madali ang lahat ng ito, ngunit kung bubuksan ang diwa, puso’t isipan, tiyak na makakasama natin si Hesus, kapiling ang ating kapwa sa ating buhay, araw-araw. Amen.

- BRO. BUEN ANDREW CRUZ, SSP

This podcast is brought to you by the Paulines Multimedia. It is our mission to Bring the WORD of GOD to all peoples through sounds and images, voices and music. Come and join us as we share “A THOUGHT A DAY”

MABUTING BALITA l SETYEMBRE 21, 2022 – MIYERKULES

Ika – 25 na LINGGO sa Karaniwang Panahon

Ebanghelyo: Mt 9:9-13

Sa paglalakad ni Hesus, nakita niya ang isang lalaking nagngangalang Mateo na nakaupo sa singilan ng buwis at sinabi niya rito: “Sumunod ka sa akin.” At tumayo si Mateo at sinundan s’ya. At habang nasa hapag si Hesus sa bahay ni Mateo, maraming taga-singil ng buwis at iba pang makasalanan ang lumapit at nakisalo kay Hesus at sa kanyang mga alagad. Nang makita ito ng mga Pariseo, tinanong nila ang kanyang mga alagad: “Bakit kumaking kasama ng mga makasalanan at maninigil ng buwis ang inyong guro?” Nang marinig ito ni Hesus, sinabi niya: “Hindi ang malulusog ang nangangailangan ng doktor kundi ang mga may sakit! Sige, matutunan sana ninyo ang kahulugan ng ‘Awa ang gusto ko, hindi handog.’ Hindi ako pumarito para tawagin ang mabubuti kundi ang mga makasalanan.”

Pagninilay:

Ngayon po ay kapistahan ni San Mateo Apostol y Evanghelista. Sa salitang Hebreo po ang pangalan niyang Mattityahuay nangangahulungang “Biyaya ng Diyos” o “Biyaya mula sa Diyos.” Si San Mateo po bago siya naging apostol ay isang maniningil ng buwis (tax collector). Ang mga maniningil ng buwis noong panahon ni Hesus ay kilala bilang “public sinners” makasalanan, sapagkat pinapatawan pa nila sa higit pa ang buwis para magkamkam, kaya naman mas hirap ang tao makabayad. Habang namumuhay sa ganoong paraan si Mateo, dumaan si Hesus—tara sumama ka sa akin. Walang pag-aatubili, siya’y sumama at tumalikod sa makasalanang pamumuhay. Mga kapanalig, ang pinakapuso daw ng pagliligtas ng Diyos ay awa. Kaya naman, si Hesus ang mukha ng maawaing Diyos. Ang pusong maawain ni Hesus ang naglapit sa kanya sa mga taong takot, duwag, at nahihiya sapagkat sila’y makasalanan. Ang pusong maawain ni Hesus ang siyang tumanggap at umakap sa kanila. Sa tuwing tinutukso tayo ng demonyo sa pamamagitan ng pag-papaalala sa atin kung gaano tayo ka-makasalanan, dumulog tayo sa mukha ng awa ng Diyos—si Hesus. Matularan nawa natin si Mateo na nanindigan. Kasi nga ang namulat na sa pag-ibig ni Hesus, hindi na muling pipikit, aayaw na siya sa dilim. Amen.

-BRO. VINZ, SSP