មន្ត្រី​ជាន់ខ្ពស់​គ្រប់គ្រង​ពន្ធនាគារ​ឆ្លើយ​ទទួល​ស្គាល់​ថា ជំងឺ​កូវីដ-១៩ បាន​ឆ្លង​ចូល​ដល់​ពន្ធនាគារ​ប៉េហ្ស៊ី (PJ) ឬ​ពន្ធនាគារ​រាជធានី​ភ្នំពេញ​ដែរ ក្នុង​ចំណោម​ពន្ធនាគារ​ជិត​១០​កន្លែង ដែល​មាន​អ្នក​ជាប់​ឃុំ និង​មន្ត្រី​អនុរក្ស​ពន្ធនាគារ​ឆ្លង​ជំងឺ​រលាក​សួត​ប្រភេទ​ថ្មី​នេះ។ ប៉ុន្តែ​យ៉ាង​ណា មន្ត្រី​គ្រប់គ្រង​ពន្ធនាគារ​មិន​បាន​បញ្ជាក់​ប្រាប់​តួលេខ​អ្នក​ជាប់​ឃុំ ថា​មាន​ចំនួន​ប៉ុន្មាន​ដែល​ឆ្លង​ជំងឺ​នេះ​ទេ។ មន្ត្រី​ពន្ធនាគារ​អះអាង​ថា នៅ​តាម​ពន្ធនាគារ​មាន​វិធាន​ការ​គ្រប់គ្រង​និង​ដោះស្រាយ​បញ្ហា​បាន​ត្រឹមត្រូវ ដើម្បី​ឆ្លើយតប​នឹង​ការ​រីករាលដាល​ជំងឺ​កូវីដ-១៩ ក្នុង​ពន្ធនាគារ។