នៅព្រឹកថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានសម្រេចផ្តល់ជំនួយសង្គមដល់ប្រជាពលរដ្ឋប្រមាណ៦០ម៉ឺនគ្រួសារ គឺប្រហាក់ប្រហែលនឹង ២លាននាក់ ដែលរងផលប៉ះពាល់ដោយបញ្ហាអតិផរណាដែលឡើងខ្ពស់មិនធ្លាប់មានរហូតជាង៧% នៅឆ្នាំ ២០២២នេះ។ ពលរដ្ឋដែលប្រកបរបរសេដ្ឋកិច្ចក្រៅប្រព័ន្ធគឺជាគោលដៅដែលត្រូវទទួលបានកញ្ចប់ថវិកាជំនួយសង្គមនេះ។ លោកបណ្ឌិត ឆេង គឹមឡុង នាយក​នៃ​មជ្ឈ​មណ្ឌល​នវានុវត្តន៍​ផ្នែក​អភិបាល​កិច្ច និង​ប្រជាធិប​តេយ្យ​​នៃ​​វិទ្យាស្ថាន​​ចក្ខុ​វិស័យ​​អាស៊ី​ មើលឃើញថាកិច្ចអន្តរាគមន៍របស់រដ្ឋាភិបាលនៅពេលនេះ មិនយឺតពេលទេ ដែលនេះជាផ្នែកមួយជួយសម្រួលដល់ទុក្ខលំបាករបស់ប្រជាពលរដ្ឋសម្រាប់រយៈពេលខ្លី និងរយៈពេលបង្គួរ។