ចំណូល​ពន្ធ​សរុប​របស់​ប្រទេស​កម្ពុជា​ប្រចាំឆ្នាំ​២០២១​កន្លង​ទៅ​ គឺមាន​ប្រហែល​៥ពាន់លាន​ដុល្លារ​ ក្នុង​នោះពន្ធដារ​ប្រមូល​បាន​ លើស​ផែនការ​ដល់​ទៅ២៤%​ ហើយ​គយ​ប្រមូល​បាន​ជាង៩៧%​ នៃ​ផែនការ។​ ទោះ​យ៉ាង​ណា​ចំណូល​ពន្ធ​សរុប​ដូច្នេះ​ក្នុង​វិបត្តិ​កូវីដ-១៩​ ត្រូវ​លោក​បណ្ឌិត​ គី សេរីវឌ្ឍន៍​ អ្នកជំនាញ​សេដ្ឋកិច្ច​នៃ​រាជបណ្ឌិត​សភា​កម្ពុជា​មើល​ឃើញថា​ ជា​ការ​បង្ហាញ​នូវ​ភាព​ធន់​មួយ​នៃ​កញ្ចប់​ថវិកា​ជាតិ​ និង​អាច​ទ្រទ្រង់​ស្ថានការណ៍​បាន។​ លោកថា​ ប្រសិន​បើមិន​មានការ​ផ្ទុះកូវីដ​បំប្លែង​ថ្មី​អូមីក្រុង​ទៀតទេ​ នោះ​កញ្ចប់​ថវិកា​នេះ​ នឹង​អាច​មាន​សន្ទុះ​ និង​បង្វែ​ទិសដៅ​ទៅការ​កសាង​ហេដ្ឋារចនាសម្ព័ន្ធ​ជាតិ។​