ភ្ញៀវ​ប្រចាំ​ថ្ងៃ​របស់​វិទ្យុ​RFIយើង​ រាត្រី​នេះ គឺ​បណ្ឌិត ឈាង វណ្ណារិទ្ធ ដែល​ជា​សាស្ត្រា​ចារ្យ​ខ្មែរ ​បង្រៀន​​វិទ្យាសាស្ត្រ​នយោបាយ ​នៅ​ប្រទេស​សិង្ហបុរី ​និង​ជា​ប្រធាន​វិទ្យាស្ថាន​​ចក្ខុ​វិស័យ​អាស៊ី។ ​លោក​បណ្ឌិត​រូប​នេះ ​បា​ន​វាយ​តម្លៃ​ ចំពោះ​ជំនួប​រវាង​លោក ​ហ៊ុន ​សែន ​និង​ប្រមុខ​ដឹកនាំ​ភូមា ​ថា«​ជា​ជំហាន​វិជ្ជមាន​ និង​សំខាន់​ចាំ​បាច់»​។ «ចាំបាច់​ ដើម្បី​ឈាន​ទៅ​ដោះស្រាយ​បញ្ហា​ និង​ឈាន​ទៅរក​ការ​ចរចា​រក​សន្តិភាពឲ្យ​ភូមា​ គឺ​គ្រប់ភាគីត្រូវធ្វើការ​ជាមួយ​ថ្នាក់ដឹកនាំ​របបសឹក​ ដែល​គេជាអ្នក​កាន់​អំណាច ​និង​ កាន់​កូន​សោ​ប្រទេស​»។ ចំពោះ​បណ្ឌិត ឈាង វណ្ណារិទ្ធ, «ប្រសិន​បើ​ ភូមារក​បាន​សន្តិភាព​នៅពេល​ខាងមុខ​មែននោះ គឺ​ជា​​ប្រយោជន៍​សម្រាប់​ទាំងអស់​គ្នា។ ដូច្នេះ ជួយ​ភូមា ក៏​ដូច​ជួយ​កម្ពុជាខ្លួន​ឯង​​​និង​ជួយ​អាស៊ាន​ដែរ​»៕