ចាប់​តាំង​ពី​ថ្ងៃទី០៨​ ខែវិច្ឆិកា​មក​ ប្រទេស​កម្ពុជា​បាន​ធ្វើ​ជា​ម្ចាស់​ផ្ទះ​រៀប​ចំ​កិច្ច​ប្រជុំ​កំពូល​អាស៊ាន​លើក​ទី៤០​ និង​៤១​ និង​កិច្ច​ប្រជុំ​ពាក់ព័ន្ធ។​ ព្រឹត្តិការណ៍​ដ៏​សំខាន់​នេះ​ ត្រូវ​បាន​ចូល​រួម​ពី​សហរដ្ឋអាមេរិក​ និង​ចិន​ផង​ដែរ។​ លោក​បណ្ឌិត​ រ៉ូ វណ្ណៈ ​សាស្ត្រាចារ្យ​ផ្នែក​វិទ្យាសាស្ត្រ​នយោបាយ​បាន​ថ្លែង​ថា ​ប្រទេស​កម្ពុជា​ទទួល​បាន​ផល​ប្រយោជន៍​ជា​ពិសេស​ពី​ចិន​ និង​អាមេរិក​គួរសម​ ពី​ការ​ចូល​រួម​របស់​ប្រទេស​មហា​អំណាច​ទាំង​ពីរ​ ខណៈ​ដែល​ចិន​បាន​ព្យាយាម​ពង្រីក​អំណាច​ជា​បង​ធំ​អាស៊ី​ និង​ឈាន​ទៅ​ក្តាប់​ពិភពលោក។​ ក៏​ប៉ុន្តែ​លោក​បណ្ឌិត​ រ៉ូ វណ្ណៈ ​បញ្ជាក់​ថា​កម្ពុជា​នៅ​តែ​មិន​ទាន់​មាន​ទំនុក​ចិត្ត​ពី​អាមេរិក​ជុំវិញ​ការ​សង្ស័យ​ពី​ការ​ដាក់​មូលដ្ឋាន​ទ័ព​ចិន​នៅ​កម្ពុជា​ និង​អព្យាក្រិតភាព​របស់​ប្រទេស​នេះ ​អំឡុង​ពេល​នៃ​ការ​គ្រប់គ្រង​អំណាច​ដោយ​ឯកបក្ស។​