ខេត្ត​ដែល​មាន​អាសនៈ​សភា​តំណាង​រាស្ត្រ​ ១អាសនៈ​ គួរ​បន្ថែម​ទៅ២ ឬ៣​ ដើម្បី​ឆ្លុះ​បញ្ចាំង​ពី​កំណើន​ប្រជាពលរដ្ឋ​នៅ​តាម​ខេត្ត​ទាំង​នោះ។​ នេះ​គឺ​ជា​យោបល់​មួយ​របស់​គណបក្ស​ប្រជាធិបតេយ្យមូលដ្ឋាន​ក្នុង​ចំណោម​ចំណុច​ផ្សេង​ទៀត​ ដែល​បាន​ដាក់​ទៅ​ប្រធាន​គណៈកម្មាធិការជាតិរៀបចំការបោះឆ្នោត​(គ.ជ.ប)​ នៅ​ថ្ងៃទី១៩​ ខែវិច្ឆិកា។​ គណបក្សកាន់អំណាចលើកឡើងថាការបន្ថែម ឬមិនបន្ថែមគឺអាស្រ័យលើចំនួនប្រជាពលរដ្ឋនៅក្នុងខេត្តទាំងនោះ ខណៈ​អង្គការឃ្លាំមើលការបោះឆ្នោតបញ្ជាក់ថា ការបន្ថែម​​អាសនៈជាការជំរុញឲ្យមានតំណាងរាស្ត្រចម្រុះគណបក្សនយោបាយនៅក្នុងខេត្តទាំងនោះ។​