ថ្ងៃទី១០មេសាខាងមុខនេះ គឺជាថ្ងៃបោះឆ្នោតប្រធានាធិបតីបារាំង ជុំទីមួយ។ យុទ្ធនាការឃោសនាបោះឆ្នោត ក៏​ជិតដល់ថ្ងៃបិទបញ្ចប់​ហើយដែរ។ ​បេក្ខជនឈរឈ្មោះទាំងអស់ កំពុងតែងប្រឹងប្រែង ​ធ្វើកម្មវិធីជួប​ជុំឃោសនាជាបន្តបន្ទាប់ ហើយ​នៅតាមកញ្ចក់ទូរទស្សន៍វិញ គេបានរៀបចំកម្ម​វិធី​ជជែកដេញដោល តទល់​គ្នា រវាង​បេក្ខជនឈរឈ្មោះទាំងអស់ ស្តីពីកម្មវិធីនយោបាយរៀងៗខ្លួន។ សង្គ្រាម​ឈ្លានពាន​នៅអ៊ុយក្រែន បញ្ហាសន្តិសុខ ព្រមទាំងបញ្ហាជីវភាពទំនិញឡើងថ្លៃគ្រប់មុខ ត្រូវ​បាន​គេលើកមកជជែកដេញដោល យ៉ាងទូលំទូលាយ។ ទន្ទឹមគ្នានេះ បញ្ហាប្រយុទ្ធប្រឆាំងនឹងបម្រែបម្រួលអាកាសធាតុ បែរជាមិនសូវត្រូវគេផ្តោតការចាប់អារម្មណ៍ខ្លាំងទៅវិញ បើទោះបី​បញ្ហានេះ គឺជាក្តីបារម្ភធំមួយ របស់​ប្រជាជនបារាំង ក៏ដូចជាប្រជាជន​អឺរ៉ុបទូទៅក៏ដោយ។