កាលពីថ្ងៃអាទិត្យ ទី​១២មិថុនា នៅបារាំងមានការបោះឆ្នោត​ជ្រើសរើសសមាជិកសភា ជុំទី១។ យោងតាមលទ្ធផល​បឋម គណបក្សរបស់​លោក​ប្រធានាធិបតី​ម៉ាក្រុង កំពុងតែប្រឈមនឹងការលំបាកខ្លាំង ដោយ​មិនអាចមានសមាជិក​សភាគ្រប់ចំនួន បានសំឡេងភាគច្រើននៅក្នុងសភាទេ។ ដោយឡែក សម្ព័ន្ធគណបក្សឆ្វេងនិយមវិញ បានកើនសន្ទុះខ្លាំង ដោយ​បាននាំមុខ​បន្តិចបន្តួចលើ​គណបក្ស​លោក​ម៉ាក្រុង។ យ៉ាងណាក៏ដោយ ការបោះឆ្នោត​សភាបារាំង កាលពីថ្ងៃអាទិត្យ​ម្សិលមិញនេះ មានអត្រាអ្នក​មិនទៅបោះឆ្នោតខ្ពស់បំផុត ពោលគឺ​ប្រមាណ​ជាជាង​៥២% ដែលនេះបានបង្ហាញអំពី​ការ​មិនចាប់អារម្មណ៍ និងការនឿយណាយនឹងបញ្ហានយោបាយជាតិ ពីសំណាក់​ប្រជាពលរដ្ឋបារាំងភាគច្រើន។