ថ្ងៃអាទិត្យទី​២៥កញ្ញា​ ប្រជាជនអ៊ីតាលីបានចូលរួមបោះឆ្នោតសភា និង​ដើម្បីឈានទៅបង្កើតរដ្ឋាភិបាលថ្មី នៅក្នុង​បរិបទ​វិបត្តិ​សេដ្ឋកិច្ច ជីវភាព​កាន់តែលំបាក។ យោងតាមលទ្ធផល​បឋម​ នៅព្រឹកថ្ងៃចន្ទនេះ គឺគណបក្ស​ស្តាំនិយមជ្រុល “ហ្វាស៊ីសថ្មី” ដែលដឹកនាំដោយ​លោកស្រី ចរចា ម៉េឡូនី ដែល​បាន​សំឡេងឆ្នោតនាំមុខ ហើយ​នឹងអាចឈានទៅបង្កើតរដ្ឋាភិបាលចម្រុះជាមួយ​សម្ព័ន្ធបក្សស្តាំអភិរក្សនិយម។ វាគឺជាលើកទីមួយហើយសម្រាប់អ៊ីតាលី បន្ទាប់​ពី​​របបហ្វាស៊ីសរបស់​មេដឹកនាំផ្តាច់ការ​ មូសូលីនី បានដួលរលំ​នៅ​​ឆ្នាំ​១៩៤៥ ដែល​រដ្ឋាភិបាល​នឹង​ត្រូវដឹកនាំ ដោយ​ក្រុមនយោបាយ​​ស្តាំនិយមជ្រុល ហ្វាស៊ីសសម័យថ្មី បែបនេះ។