លោកនាយករដ្ឋមន្ត្រីឥណ្ឌា ណារិន្ទ្រ ម៉ូឌី នឹងធ្វើដំណើរ​ទៅទស្សនកិច្ចនៅអឺរ៉ុប ចាប់ពីថ្ងៃចន្ទ ទី​២ឧសភា។ ជាទស្សនកិច្ច ដែលគេរំពឹងថា សំណុំរឿងសង្គ្រាមនៅអ៊ុយក្រែន គឺជាបញ្ហាស្នូលដែល​បណ្តាប្រទេសអឺរ៉ុប នឹងលើកយក​ទៅនិយាយជាមួយ​លោកនាយករដ្ឋមន្ត្រីឥណ្ឌា។ ដូចយើង​បានដឹងមកហើយ ថាឥណ្ឌាមិន​បានប្រកាសថ្កោលទោសរុស្ស៊ី ចំពោះអំពើឈ្លានពានលើអ៊ុយក្រែន និងបាន​បោះឆ្នោត​អនុប្បវាទនៅអង្គការសហប្រជា​ជាតិ ថែមទៀត។  ជាងនេះទៀត មិនត្រឹមតែ​មិន​បាន​ចូលរួម​ក្នុងទណ្ឌកម្មសេដ្ឋកិច្ច ​របស់សហគមអន្តរជាតិ ដែលដាក់ទៅលើរុស្ស៊ី ឥណ្ឌាបែរជា​បានបង្កើតការទិញទំនិញ​ប្រេងរបស់រុស្ស៊ី ផងដែរ។