នៅតៃវ៉ាន់ កាតព្វកិច្ច​កងទ័ព​សម្រាប់​យុវជន​តៃវ៉ាន់​នឹងត្រូវ​បង្កើនរយៈពេល​​ពី​៤ខែ ទៅ ១ឆ្នាំ។ នេះបើតាម​ការប្រកាស​របស់​ប្រធានាធិបតី​តៃវ៉ាន់ លោកស្រី ត្សៃ អ៊ីងវេន នៅក្នុងសន្និសីទ​កាសែត​កាលពីថ្ងៃអង្គារ ទី ២៧​ធ្នូ។ ការសម្រេច​របស់​ប្រមុខរដ្ឋាភិបាល​តៃវ៉ាន់ធ្វើឡើង​នៅ​មួយថ្ងៃ​ក្រោយ តៃវ៉ាន់​ប្រតិកម្ម​រិះគន់​ខ្លាំងៗ ចិន ដែលបាន​បញ្ជូន​យន្តហោះចម្បាំង និង​ដ្រូន​ក្នុង​ចំនួន​ដ៏ច្រើន (៧១) ទៅហោះរំលោភចូល​ដែនអាកាស​តៃវ៉ាន់ កាលពីថ្ងៃ​ចន្ទ​ដើមសប្តាហ៍។ ដោយ​បង្កើន​រយៈពេល​ជាប់កាតព្វកិច្ច ដើម្បី​ជំរុញ​ការបណ្តុះបណ្តាល ពង្រឹង​សមត្ថភាព​​យោធា​របស់​យុវជន តៃវ៉ាន់ចង់​ត្រៀម​ខ្លួន​ទប់ទល់​ចិន ដែល​ធ្វើ​សកម្មភាពគំរាមកំហែង បំភិតបំភ័យ​ពីមួយថ្ងៃ ទៅមួយថ្ងៃ។