រដូវ​ក្តៅ​ទើប​តែ​ចាប់ផ្តើម​ទេ​នៅ​អឌ្ឍគោល​ខាង​ជើង ប៉ុន្តែមួយ​ផ្នែក​ធំ​នៃ​​តំបន់​នេះបាន​រង​រលក​កម្តៅយ៉ាង​ខ្លាំង និង​ខ្លាំង​ជ្រុល​​ស្រេច​ទៅហើយ។ ​ភពផែនដី ពីលិចទៅកើត កំពុង​រង​លក្ខខណ្ឌ​អាកាសធាតុ​បែប​ហួសហេតុ​គ្រប់​បែប​យ៉ាង ៖ រលកកម្តៅលើ​ផ្ទៃដី លើ​ផ្ទៃ​ទឹក ទឹកជំនន់ ភ្លើង​ឆេះ​ព្រៃ... ​តាំងពី​នៅ​អាមេរិក ​​​ឆ្លង​ទៅ​​​អឺរ៉ុប និង​រហូត​ដល់​ចិន សីតុណ្ហភាព​ត្រូវ​​ឡើង​ខ្ពស់​បំបែក​កំណត់ត្រា​ចាស់​ នាចុង​សប្តាហ៍​នេះ​តែ​ម្តង​ផង។ លក្ខខណ្ឌអាកាសធាតុ​ក្តៅ​ហួសហេតុ​ កាន់​តែ​ច្រើន កាន់​តែ​ឆាប់ និង​កាន់​តែ​ខ្លាំង​នេះ គឺ​ដោយមូល​ហេតុ​​​​អាកាសធាតុ​​ប្រែប្រួល ផែន​ដី​ឡើង​កម្តៅ​។