ក្រុម​ប្រទេស​មហាអំណាច​ឧស្សាហកម្ម​ទាំង ៧ប្រទេស​ក្នុង​លោក​ហៅកាត់ G៧ បាន​បើក​កិច្ចប្រជុំកំពូល​រយៈពេល ៣ថ្ងៃ​នៅ​ក្នុង​ប្រទេស​អាល្លឺម៉ង់​ដោយ​ចាប់​ផ្តើម​នៅ​ថ្ងៃ​អាទិត្យ ទី២៦ មិថុនា។ មាន​ការ​កត់សម្គាល់​ចំនួន​ពីរ​នៅ​ក្នុង​កិច្ចប្រជុំកំពូល G៧ ឆ្នាំ ២០២២ នេះ ទី១ ការ​ចូលរួម​ដោយ​ផ្ទាល់​របស់​មេដឹកនាំ​ទាំង ៧ប្រទេស និង​ទី២ សង្រ្គាម​រុស្ស៊ី​ឈ្លានពាន​អ៊ុយក្រែន​បាន​ឈាន​ចូល​ដល់​ខែ​ទី៥។ តាម​គម្រោង ប្រធានាធិបតី​អ៊ុយក្រែន​លោក​ហ្សេឡេនស្គី​នឹង​ថ្លែង​តាម​វីដេអូ​ទៅ​កាន់​មេដឹកនាំ G៧ នៅ​ថ្ងៃ​ចន្ទ ទី២៧ មិថុនា។