នៅ​យប់​ថ្ងៃ​សៅរ៍ ទី១៧ កញ្ញា ប្រធានាធិបតី​អាមេរិក​លោក​បៃដិន​បាន​អញ្ជើញ​ទៅ​ដល់​ទីក្រុង​ឡុងដ៏ ប្រទេស​អង់គ្លេស​ដើម្បី​ចូលរួម​នៅ​ក្នុង​ពិធី​បុណ្យសព​ព្រះមហាក្សត្រិយ៍​អេលីហ្សាបិត​ទី២ ដែល​ត្រៀម​ធ្វើ​ក្នុង​ថ្ងៃ​ចន្ទ ទី១៩ កញ្ញា។ តែ​មុន​នឹង​ចាកចេញ​ពី​អាមេរិក លោក​បៃដិន​បាន​ផ្តល់​បទសម្ភាសន៍​មួយ​ឲ្យ​កាណាល់​ទូរទស្សន៍ CBS។ នៅ​ក្នុង​បទសម្ភាសន៍ លោក​បៃដិន​បាន​អំពាវនាវ​ក្នុង​ន័យ​ព្រមាន​កុំ​ឲ្យ​ប្រធានាធិបតី​រុស្ស៊ី​លោក​ពូទីន​ប្រើ​អាវុធ​គីមី ឬ​អាវុធ​នុយក្លេអ៊ែរ​នៅ​ក្នុង​សង្រ្គាម​អ៊ុយក្រែន។