នៅ​ថ្ងៃ​អង្គារ ទី៧ ធ្នូ ប្រធានាធិបតី​អាមេរិក​លោក​បៃដិន និង​សមភាគី​រុស្ស៊ី​លោក​ពូទីន​មាន​កិច្ចសន្ទនា​តាម​អនឡាញ​រវាង​គ្នា។ នៅ​ក្នុង​កិច្ចសន្ទនា មេដឹកនាំ​មហាអំណាច​ទាំង​ពីរ​គ្រោង​នឹង​លើក​យក​ប្រធានរឿង​ជា​ច្រើន​ទៅ​ជជែក ក្នុង​នោះ​ក៏​មាន​រឿង​អ៊ុយក្រែន​មួយ​ដែរ។ គួរ​បញ្ជាក់​ថា លោក​បៃដិន និង​លោក​ពូទីន​ធ្លាប់​បាន​ជួប​សន្ទនា​គ្នា​តាម​ទូរស័ព្ទ​ច្រើន​ដង និង​ធ្លាប់​បាន​ជួប​គ្នា​ដោយ​ផ្ទាល់​កាល​ពី​ខែ​មិថុនា​កន្លង​ទៅ​នៅ​ក្នុង​ទីក្រុង​ហ្សឺណែវ ប្រទេស​ស៊្វីស។ តែ​កិច្ចសន្ទនា​តាម​អនឡាញ​លើក​នេះ​ត្រូវ​បាន​គេ​ចាត់​ទុក​ជា​កិច្ចសន្ទនា​ប្រកប​ដោយ​ហានិភ័យខ្ពស់។