ដើមសប្តាហ៍នេះ រាជទាយាទ ព្រះអង្គម្ចាស់ មូហាម៉េដ បេន សាល់ម៉ាន បាន​បង្ហាញជាថ្មី គម្រោងមហាទីក្រុងទំនើបនៅអារ៉ាប៊ីសាអូឌីត ដែល​ត្រូវ​សាង​សង់​លើសមុទ្រ ហើយ​កាត់វាលខ្សាច់និងភ្នំ ចម្ងាយ​១៧០គីឡូម៉ែត្រ។ នេះគឺ​ជា​មហាគម្រោង​ក្រុង​ថ្មី ដើម្បីស្តារមុខមាត់​ព្រះរាជាណាចក្រ និង​ដើម្បី​ធ្វើ​ពិពិធកម្ម​សេដ្ឋកិច្ច​ ហើយ​ក៏​ដើម្បី​បំពេញ​តម្រូវ​ការ​កំណើន​ប្រជាជន ផង​។ ​​​ អារ៉ាប៊ីសាអូឌីត រំពឹង​ថា​នឹង​មានប្រជាជនរស់​​នៅមហាបណ្តុំ​ទីក្រុង​ថ្មី ប្រមាណ​១០០លាន​​នាក់ នា​ឆ្នាំ​២០៤០។ ក៏ប៉ុន្តែ មហា​ក្រុង​ថ្មីនេះ ត្រូវ​អ្នក​សេដ្ឋកិច្ច​និង​ស្ថាបត្យករ​ យល់ថា «លំបាក​នឹង​ទៅរួច» ប្រសិន​បើផ្អែក​ទៅលើ​ផ្នែក​វិនិយោគ​លុយកាក់សម្រាប់​​សាងសង់ ហើយចំណែក ​មហិច្ចតា​ផ្នែក​បរិស្ថានដែល​គ្រោង​មិន​បញ្ចេញ​ផ្សែង​ពុល​ ក៏​សឹងតែ​គេ​មិន​ជឿ។