អង្គការ​ពាណិជ្ជកម្មពិភពលោក​ហៅកាត់​ជា​ភាសា​អង់គ្លេស WTO បាន​បិទ​បញ្ចប់​កិច្ចប្រជុំ​ថ្នាក់រដ្ឋមន្រ្តី​លើកទី១២ រយៈពេល ៥ថ្ងៃ​ក្នុង​ទីក្រុង​ហ្សឺណែវ ប្រទេស​ស៊្វីស។ នៅ​ទីបំផុត និង​ក្រោយ​ពី​បាន​ជជែក​គ្នា​យ៉ាង​តានតឹង ក្រុម​សមាជិក WTO ទាំង ១៦៤ប្រទេស​បាន​អនុម័ត​លើ​កញ្ចប់​វិធានការ​មួយ​ដែល​មាន ៤ចំណុច​សំខាន់។ ភ្លាមៗ​នៅ​ក្រោយ​ការ​អនុម័ត​លើ​កញ្ចប់​វិធានការ អគ្គនាយិកា WTO លោកស្រី​អិនហ្កូហ្ស៊ី អូកុនហ្សូ អ៊ីវេឡា​បាន​ថ្លែង​សាទរ និង​បញ្ជាក់​ថា លទ្ធផល​នេះ​ជា​សក្ខីកម្ម​ដែល​ឆ្លុះ​បញ្ចាំង​ពី​សមត្ថភាព​របស់ WTO ក្នុង​ការ​ជំនះ​លើ​ភាព​មិន​ចុះ​សម្រុង​គ្នា។