បន្ទាប់ពីប្រទេសអង់គ្លេស បានចាកចេញជាស្ថាពរពី​សហភាពអឺរ៉ុប តំបន់អៀរឡង់ខាងជើងរបស់អង់គ្លេស​ គឺជា​ចំណុចខ្ទាស់មួយដ៏សំខាន់ បង្កឲ្យ​សឹងតែមានជម្លោះនឹងគ្នា រវាងសហភាពអឺរ៉ុបនិងអង់គ្លេស ដោយសារតែតំបន់នេះមានព្រំដែនគោក ជាប់ជាមួយសាធារណរដ្ឋអៀរឡង់ ដែលជាប្រទេសសមាជិកសហភាពអឺរ៉ុប។​ បញ្ហាធំបំផុតនោះ គឺវាពាក់ព័ន្ធនឹង​​ចរាចរណ៍ទំនិញ វិស័យ​ពន្ធដារ ព្រមទាំងស្តង់ដារទំនិញ​គ្រប់ប្រភេទ នៃទីផ្សាររួមរបស់សហភាពអឺរ៉ុប​។ ឆ្លងកាត់ការចរចាដ៏ស្វិតស្វាញ នៅទីបំផុតរដ្ឋាភិបាលអង់គ្លេស ដឹកនាំដោយលោក រីស៊ី ស៊ូណាក់ និង​គណកម្មការអឺរ៉ុប បាន​សម្រេចបាននូវកិច្ចព្រមព្រៀងថ្មីមួយ ដើម្បី​ដោះស្រាយ គ្រប់គ្រងបញ្ហាតំបន់អៀរឡង់ខាងជើងនេះ។