ក្រៅតែពីយុទ្ធនាការឃោសនាតាមដងផ្លូវ និងលើកស្លាកបក្សនៅតាមទីសាធារណ ប្រព័ន្ធបណ្តាញសង្គមហាក់កំពុងក្លាយជាឧបករណ៍ទំនើបថ្មីមួយបន្ថែមរបស់អ្នកនយោបាយខ្មែរ ក្នុងការផ្សព្វផ្សាយគោលនយោបាយ និងស្វែងរកសម្លេងគាំទ្រពីប្រជាពលរដ្ឋ ជាពិសេសពីសំណាក់ក្រុមយុវជន។ អ្នកនយោបាយមួយចំនួនបានសម្រេចប្រើយុទ្ធសាស្ត្របែបនេះ ដើម្បីទាក់ទាញយុវជនឱ្យចាប់អារម្មណ៍ចំពោះគោលនយោបាយរបស់ខ្លួន ខណៈ៧៨% រឺស្មើនឹង១២លាននាក់នៃប្រជាជនខ្មែរសរុបកំពុងប្រើប្រាស់ប្រព័ន្ធបណ្តាញសង្គម។ ជុំវិញរឿងនេះ អ្នកវិភាគនយោបាយ និងតាមដានបញ្ហាសង្គមមួយចំនួនបានលើកឡើងថា ការប្រើប្រាស់ប្រព័ន្ធបណ្តាញសង្គម គឺពិតជាងាយស្រួលក្នុងការបញ្ជ្រៀបសារនយោបាយទៅកាន់យុវជនខ្មែរ ក៏ប៉ុន្តែការប្រើប្រាស់វិធីសាស្ត្របែបនេះ របស់អ្នកនយោបាយនីមួយៗ គឺត្រូវប្រាកដថា វាអាចផ្តល់ភាពរីកចម្រើនដល់សង្គមជាតិ និងការចង់បានរបស់យុវជននោះផ្ទាល់។