បេសកកម្ម «២៥ថ្ងៃ ២៥ខេត្តក្រុង ដើម្បីលើកកម្ពស់ការអាននៅតាមសហគមន៍» ចាប់ធ្វើឡើង ពីថ្ងៃទី១០សីហារហូតដល់ថ្ងៃទី១០កញ្ញា ឆ្នាំ២០២៤ នៅក្នុងគោលដៅ ចែកសៀវភៅដល់យុវជនតាមសហគមន៍ និងស្វែងរកជើងឯកអំណានប្រចាំខេត្តនីមួយ។ «២៥ថ្ងៃ ២៥ខេត្តក្រុង ដើម្បីលើកកម្ពស់ការអាននៅតាមសហគមន៍» ជាបេសសកម្មមួយក្នុងយុទ្ធនាការ«សៀវភៅមួយសហគមន៍មួយ»ដែលបានបង្កើតឡើងកាលពី២ឆ្នាំមុន។ នៅក្នុងបទសម្ភាសន៍ជាមួយវិទ្យុបារាំងអន្តរជាតិ Rfi នៅថ្ងៃទី១៣សីហានេះ អ្នកស្រី ហ៊ាង វត្តី សហស្ថាបនិកយុទ្ធនាការលើកឡើងថា គំនិតផ្តួចផ្តើមបង្កើតយុទ្ធនាការនេះឡើង គឺនៅបន្ទាប់ពីមើលឃើញថា យុវជនខ្មែរហាក់នៅពុំទាន់ទទួលបានការលើកទឹកចិត្ត និងគ្មានសៀវភៅអានគ្រប់គ្រាន់ ដែលជាកត្តាមួយរុញឱ្យពួកគេងាកទៅកាន់ទូរស័ព្ទ។ តាមលោកស្រី ហ៊ាង វត្តី «យុទ្ធនាការសៀវភៅមួយសហគមន៍មួយ» នឹងបណ្តុះវប្បធម៌អាន និងការរៀនសូត្រឯករាជ្យ នៅក្នុងចំណោមយុវជនខ្មែរ។