ការផ្ដល់រង្វាន់លើកទឹកចិត្តដូចជាម៉ូតូ កុំព្យូទ័រ និងថវិកាមួយចំនួនចំពោះបេក្ខជនប្រឡងជាប់និទ្ទេសA បានក្លាយជាវប្បធម៌ដ៏ពេញនិយមរបស់រដ្ឋាភិបាលកម្ពុជាមិនថា អាណត្តិចាស់ ឬអាណត្តិថ្មី។ ចំណែក ឱកាសទទួលបានអាហារូបករណ៍នៅថ្នាក់ឧត្តមសិក្សាវិញ សិស្សនិទ្ទេសAពួកគេតែងទទួលបានឱកាសខ្ពស់ជាងសិស្សដែលប្រឡងជាប់និទ្ទេសផ្សេងទៀត។ ពាក់ព័ន្ធនឹងរឿងនេះ អ្នកតាមដានសង្គមលើកឡើងនូវគោលគំនិតស្រដៀងៗគ្នា ដោយស្នើឱ្យរដ្ឋាភិបាលផ្ដល់នូវអាហារូបករណ៍ដូចជាការបង់ថ្លៃសាលារៀន កន្លែងស្នាក់នៅ និងប្រាក់ឧបត្ថម្ភបន្តិចបន្តួច ចំពោះសិស្សជាប់បាក់ឌុបគ្រប់និទ្ទេសទាំងអស់ដែលមិនមានលទ្ធភាពបន្តការសិក្សានៅថ្នាក់ឧត្តមសិក្សា។ ការស្នើយ៉ាងដូច្នេះ បន្ទាប់ពីអ្នកតាមដានសង្គមទាំងនេះសង្កេតឃើញអត្រាសិស្សដែលឈប់រៀនត្រឹមថ្នាក់ទី១២មានចំនួនច្រើន ពិសេសនៅតាមទីជនបទដាច់ស្រយាល។  ដូច្នេះ ថាតើការជួយដល់សិស្សក្រីក្រគួរតែធ្វើទៅទាំងព្រមដោយមិនគិតតែលើនិទ្ទេសAឬ?