នៅ​មិន​ដល់​មួយខែ​ទេ កម្ពុជា​នឹង​រៀបចំ​ការបោះឆ្នោត​ក្រុមប្រឹក្សា​ឃុំ​សង្កាត់ នៅថ្ងៃទី០៥មិថុនា​​ឆ្នាំ២០២២​។ ចំណែក​យុទ្ធនាការ​ឃោសនា​រក​សំឡេង​ឆ្នោត នឹង​បន្លឺ​ឡើង​ចាប់ពីថ្ងៃទី២១ឧសភា​ដល់​ថ្ងៃ​ទី៣​មិថុនា។ អ្នកវិភាគ និងអ្នកតាមដាន​បញ្ហា​សង្គម ចង់​ស្ដាប់​គោលនយោបាយ​របស់​គណបក្ស​ដែល​ចូលរួម​ការ​បោះឆ្នោត​ក្រុម​ប្រឹក្សា​ឃុំ-សង្កាត់ ចាក់​ឲ្យ​បញ្ហា​របស់​សង្គម និង​តម្រូវ​ការ​ជាក់ស្ដែង​របស់​ពលរដ្ឋ។​ឧទាហរណ៍ ការរកទីផ្សារ​នាំ​ចេញ​ផលិត​ផល​កសិកម្ម និងការទទួល​ទិញ​ផលិតផល​កសិកម្ម​ដែល​មិនអាច​នាំ​ចេញ​ទៅ​ក្រៅបាន។ បន្ថែមលើនេះពួកគេព្រមានថា ស្ថិត​នៅ​ក្នុង​សម័យឌីជីថល​ការឃោសនា​ឬការដាក់ចេញគោលនយោបាយត្រូវមានការប្រុងប្រយ័ត្នបន្តិច បើ​ពុំដូច្នោះ​ការឃោសនា​ស្វែង​រក​សំឡេងឆ្នោត​អាច​ប្រែ​មក​ជា​ការទម្លាក់​សន្លឹកឆ្នោត​វិញ។